2018—2019-yillarda Respublika shoshilinch tibbiy yordam ilmiy markazi filiallarida qurilish-ta’mirlash ishlari uchun 62,33 milliard so‘m mablag‘ o‘zlashtirildi, deb xabar beradi Sog‘liqni saqlash vazirligi jamoatchilik bilan aloqalar bo‘limi.
Investitsiya dasturi doirasida 202,1 milliard so‘m mablag‘ hisobidan 2019-yilda RSHTYoIM hududida kardioxirurgiya, transplantologiya va neyro-qon tomir xirurgiyasi bo‘limlari uchun yangi besh qavatli bino qurilishi boshlandi.
O‘tgan qisqa vaqt mobaynida tez yordam xizmati ham tobora zamonaviylashib borayapti. Keyingi yillarda tez yordamning maxsus sanitar avtotransport parki yangilandi. Bugungi kunda tizimda ikki yarim mingga yaqin Nissan, Hundai, Toyota rusumli va boshqa zamonaviy tez yordam mashinalari aholiga xizmat ko‘rsatmoqda.
Yangi xarid qilingan 281 ta reanimobillar 4,1 million AQSh dollari miqdoridagi zarur asbob-uskunalar bilan to‘liq jihozlandi. 2019-yilda yana 150 ta tibbiy asbob-uskunalar va aloqa vositalari bilan to‘liq jihozlangan Ford rusumidagi reanimobillar xarid qilindi.
“Bunday keng qamrovli islohotlar natijasida aholining tez tibbiy yordam xizmatiga bo‘lgan ishonchi ortmoqda, murojaatlar yil sayin oshib borayapti. Masalan, taqqoslash uchun aytadigan bo‘lsak, 2016-yilda chaqiriqlar soni 7,2 millionni tashkil qilgan bo‘lsa, 2017-yilda – 8,7 million. 2018-yilda esa 9,8 millionga yetgan. Joriy yilning o‘tgan 10 oyi ichida esa murojaatlar soni to‘qqiz milliondan oshgan”, — dedi shoshilinch va tez tibbiy yordam masalalari bo‘yicha mahalliy koordinator Obidjon Dilmurodov.
Shu bilan birga, shoshilinch tibbiy yordam xizmatining statsionar muassasalariga ham murojaatlar ko‘paymoqda.
Jumladan, 2017—2019-yillarda ushbu shifo maskanlariga 7,5 milliondan ziyod bemor murojaat qilgan. Ulardan 2,5 million nafari statsionar, 5 milliondan ortig‘i esa ambulator tibbiy yordamdan bahramand bo‘lgan. Statsionarda davolangan bemorlarning 500 mingdan ortig‘iga yuqori texnologik xirurgik amaliyotlar bajarilgan.
Izoh (0)