Farg‘ona viloyati Beshariq tumanida faoliyat ko‘rsatayotgan fermer xo‘jalik rahbari N.Parpiyev “SE-303” rusumli elektr hisoblagichni “Elektr-hisob” bazasiga kirim qilmasdan, texnik shart va hech qanday ruxsat olmagani holda fermer xo‘jaligining dala maydonidagi yuqori quvvatli suv nasosiga o‘rnatib olgani ma’lum bo‘ldi. Bu haqda Majburiy ijro byurosi “Daryo”ga ma’lum qildi.
Fermer N.Parpiyev elektr energiyasidan go‘yoki qonuniy foydalanayotgan qilib ko‘rsatish uchun suv nasosini elektr hisoblagich bilan jihozlab ham qo‘ygan.
Biroq Majburiy ijro byurosining Beshariq tuman bo‘limi tezkor xodimlari tomonidan o‘tkazilgan tadbirda fermerning qing‘ir ishi fosh etilib, elektr energiyasidan noqonuniy foydalanganligi oqibatida davlat manfaatlariga 151 million 820 ming so‘m moddiy zarar yetkazganligi aniqlangan.
Tergovga qadar tekshiruvda huquqbuzar fermer N.Parpiyevga Jinoyat kodeksining 185-2-moddasi (“Elektr, issiqlik energiyasi, gaz, vodoprovoddan foydalanish qoidalarini buzish”) 6-qismida nazarda tutilgan o‘ttiz kunlik muddatda yetkazilgan moddiy zararning o‘rnini qoplagan taqdirda jinoiy javobgarlikdan ozod etilishi mumkinligi haqidagi talab tushuntirilgan.
Fermer jarimani to‘lashga rozi bo‘lgan va belgilangan muddat davomida yetkazilgan zararni qoplagan.
Izoh (0)