Prezident matbuot xizmatining ma’lum qilishicha, O‘zbekistonda 2016-yilda davlat dasturlari doirasida qishloqlarda 13 mingta turar joy, tadbirkorlar tomonidan 13 ming 189 ta xonadonli uy (jami 26 ming 189 ta) qurilgan bo‘lib, buning uchun 4 trillion 330 milliard so‘m sarflangan.
2017-yilda esa davlat dasturlari doirasida qariyb 29 mingta, jumladan qishloqlarda 20,3 mingta, shaharlarda 8,5 mingga yaqin turar joy qad ko‘targan. Shuningdek, tadbirkorlar tomonidan 16 mingdan ziyod xonadonli uy qurilgan. Ya’ni, umumiy hisobda qariyb 45 mingta uy-joy barpo etilib, bular uchun 6,2 trillion so‘m sarflangan.
2018-yilda bunyodkorlik ko‘lami yanada kengaydi. Xususan, davlat dasturlari doirasida 42,2 mingta, shu jumladan qishloqlarda 25,3 mingta, shaharlarda qariyb 17 ming turar joy, tadbirkorlar tomonidan jami 19,7 ming kvartiradan iborat uylar qurilgan. Ya’ni, qariyb 62 mingta uy-joy barpo etilib, 12 trillion 130 milliard so‘m sarf-xarajat qilindi.
2019-yilning o‘tgan davri mobaynida davlat dasturlari doirasida qariyb 30 mingta, shu jumladan qishloqlarda 15 mingdan ziyod, shaharlarda 15 mingga yaqin turar joy, tadbirkorlar tomonidan esa jami 19,5 ming xonadonni o‘z ichiga olgan uylar barpo etilgan. Umumiy hisobda qariyb 49,5 ming uy-joy qurilib, buning uchun 12 trillion 24 milliard so‘m yo‘naltirilgan.
“Hisob-kitoblarga ko‘ra, xalqimiz ehtiyojini to‘la qondirish uchun har yili 145 ming xonadondan iborat uylar qurish kerak. Buning uchun esa qariyb 30 trillion so‘m zarur bo‘ladi. Bu mablag‘ esa davlat byudjetining 23 foizidan ziyodini tashkil etadi”, — deya xabar bermoqda Prezident matbuot xizmati.
Izoh (0)