Qoraqalpog‘istonda 2019-yilning to‘qqiz oyi davomida to‘rtta holatda tibbiyot hodimlariga tajovuz bo‘lgan. Bu haqda 26-oktabr, shanba kuni Nukus shahrida Bosh prokuratura Akademiyasi tomonidan huquqbuzarliklar profilaktikasiga bag‘ishlab o‘tkazilgan yig‘ilishda aytib o‘tildi, deya xabar bermoqda “Daryo” muxbiri.
Bosh prokuratura Akademiyasi tomonidan Prezident Shavkat Mirziyoyevning “Jamoat xavfsizligini ta’minlash samaradorligini oshirish bo‘yicha qo‘shimcha chora-tadbirlar to‘g‘risida”gi farmoni ijrosini ta’minlash maqsadida Tabobat akademiyasi bilan hamkorlikda yig‘ilish tashkil etildi. Unda huquqbuzarliklar, jumladan, tibbiyot xodimlariga nisbatan bo‘layotgan tajovuzlarning ortib borayotganligi muhokama qilindi.
Anjumanda tibbiyot xodimlariga bo‘layotgan tajovuzlarning aksari fuqarolarning hissiyotga berilib, o‘zini tuta olmasliklari natijasida kelib chiqilayotgani ma’lum qilindi. Ba’zi hollarda esa shifokorlarning o‘z ishiga nisbatan sovuqqonlik bilan qarashi oqibatida ham ularga nisbatan kuch ishlatish holatlari kuzatilayotgani aytib o‘tildi. Ushbu fikrlarga Qoraqalpog‘iston Sog‘liqni saqlash vaziri o‘rinbosari Fahriddin Abdullayev izoh berib o‘tdi.
“To‘g‘ri, biz — tibbiyot xodimlari o‘zimizni oqlamaymiz. Lekin har qanday vaziyatda ham masalaga huquqni muhofaza qiluvchi organlar baho berishi kerak. Albatta, shifokorlarning aybi bo‘lsa, o‘rnatilgan tartibda jazosini olishi lozim”, — dedi vazir o‘rinbosari Abdullayev.
Ma’lum qilinishicha, tibbiyot xodimlariga bo‘layotgan g‘ayriqonuniy xatti-harakatlar to‘g‘risida taqdim etilayotgan statistik raqamlar faqat murojaat qilinganlari xolos. Aslida, tajovuzlar bundan ham ko‘p. Chunki, aksar hollarda tibbiyot xodimlari huquqni muhofaza qiluvchi organlarga shikoyat qilmaydi. Shu bilan birga, bemor yoki uning qarindoshlari jinoyatlarni yashiradi.
Bosh prokuratura Akademiyasi katta prokurori Jahongir Mirahmedovning ta’kidlashicha, shaxslarga, jumladan, tibbiyot xodimlariga nisbatan bo‘layotgan tajovuzlarni yashirish o‘sha huquqbuzarlikning og‘irroq holatlarini keltirib chiqarishi mumkin.
“Har qanday sabab bo‘lishidan qat’i nazar shifokorga tajovuz qilinishining oldini olmaslik — ta’sir chora ko‘rsatmaslik o‘sha odamda qonunlarni mensimasdan munosabatda bo‘lish ruhini shakllantiradi. Shu bilan birga, nafaqat tibbiyot xodimlarga, balki boshqa fuqarolarga ham hurmatsizlik kayfiyatini uyg‘otadi”, — dedi Akademiyaning jinoyatlarning sodir etilishi sabablarini tizimli tahlil qilish va o‘rganish markazi xodimi Mirahmedov.
Uning qo‘shimcha qilishicha, hududlarda jinoyatlar sodir etilishi sabablarini tizimli tahlil qilish guruhlari tomonidan shifokorlarga bo‘layotgan tajovuzlar o‘rganib chiqilmoqda. Tahlillar natijasi shuni ko‘rsatmoqdaki, muammoni bartaraf etishda jamoatchilik nazoratini o‘rnatish katta samara beradi. Shu bois o‘zini-o‘zi boshqarish organlari va jamoat tashkilotlaridan ko‘proq faollik talab etiladi.Ma’lumot uchun, Qoraqalpog‘istonda 2018-yilda tibbiyot xodimiga nisbatan tajovuz qilish bo‘yicha bitta holatda ichki ishlar idorasiga ariza kelib tushgan. 2019-yilning to‘qqiz oyi davomida esa to‘rtta shunday holat yuz bergan. Bularning bittasida bemor ayolning mast eri chaqiriqqa borgan haydovchini urib, jag‘ tishini sindirgan. Yana bir holatda esa mast er bemor xotinini ko‘rikdan o‘tkazishga ruxsat bermay, shifokorni kaltaklagan.
Izoh (0)