Косонлик Фазилат Нормуродованинг ижтимоий тармоқларда тарқалган мурожаати Қашқадарё вилоят соғлиқни сақлаш бошқармаси томонидан ўрганилди. Бу ҳақда «Дарё»га Қашқадарё вилоят соғлиқни сақлаш бошқармаси ахборот хизмати раҳбари Нуриддин Эгамов хабар бермоқда.
Косон туғруқ комплексининг туғруқ бўлими 2019 йил 1 октябрдан 20 октябргача йиллик жорий таъмирлаш учун режа асосида ёпилган. Шу сабабли туғруқ комплекси гинекология бўлимида туғруқ зали ташкил этилиб, физиологик туғруқлар олиб борилган. Бу ҳақда туман ва вилоят тиббиёт ташкилотларига хабар қилинган.
2019 йил 14 октябрь куни мурожаат муаллифларидан бири Фазилат Нормуродованинг келини Гулчирой Қаюмова Косон тумани тиббиёт бирлашмасига қарашли туғруқ комплексига келтирилган. Унга ҳомиладорлик II, туғруқ II, 40 ҳафта муддатдаги туғруқ ташхиси қўйилган.
Аёл 2019 йил 14 октябрь куни соат 12:05 да гинекология бўлимидаги ташкиллаштирилган туғруқ залида ўғил фарзандни дунёга келтирган. Чақалоқнинг вазни 3,6 килограммни, бўйи 54 сантиметрни ташкил қилган. Шу куни соат 17:10 да шифокорларнинг қаршилигига қарамасдан, чақалоқнинг яқинлари геповакс вакцинасини олдирмасдан туриб, уни уйга олиб кетган. Бу вақтда чақалоқнинг умумий аҳволи яхши бўлган.
Чақалоқ 15 октябрь куни режали равишда олиниши керак бўлган геповакс вакцинасини олиш учун туғруқ комплексига олиб келинган. Келганида неонатолог шифокор, чақалоқлар бўлими бошлиғи Дилфуза Ҳасанова томонидан кўрилиб, умумий аҳволи яхшилиги ва вакцина олишга қарши кўрсатмалари бўлмаганлиги учун вакцинацияга рухсат берилган, асоратлари тушунтирилган ва эмлаш амалга оширилган. Чақалоқнинг умумий аҳволи қониқарли бўлган. Онасининг гапига кўра, кечаси безовта бўлмаган.
Маълум қилинишича, мурожаат муаллифининг «туғруқхона биносини таъмирлаш учун пул сўради» деган даъволари асоссиз. Туғруқ комплекси биноси маҳаллий бюджет ҳисобидан таъмирланмоқда.
Туғруқхонада физиологик туғруқлар учун бирламчи дори воситалари мавжуд. Гулчирой Қаюмовага ва унинг чақалоғига ҳам туғруқхонада бор дори-дармонлар ишлатилган. Ҳеч кимдан ҳеч қандай дори учун пул сўралмаган, дейилади бошқарма хабарида.
16 октябрь куни эрталаб соат 10:10 да Гулчирой Қаюмованинг чақалоғини бувиси Фазилат Нормуродова кўтариб БСЖ вакцинасини эмлатиш учун туғруқ комплексидаги эмлаш хонасига олиб келган. У эмлаш ҳамшираси чақалоқлар бўлими бошлиғи Дилфуза Ҳасанова ва доя Соҳиба Жўраевани чақиртирган. Улар чақалоқни кўриб, аҳволи яхши эмаслигини, ранги кўкимтирлигини, тезда уни болалар шифохонасига олиб бориш кераклигини айтган. Боланинг аҳволи яхши бўлмаганлиги сабабли у БСЖ вакцинаси билан эмланмаган.
Шундан сўнг боланинг яқинлари ўзларининг машинасида уни вилоят кўп тармоқли болалар тиббиёт марказига ўта оғир аҳволда олиб борган. Чақалоқлар реанимацияси бўлимида кўрсатилган тиббий ёрдамга қарамасдан, тахминан 15 дақиқадан сўнг биологик ўлим содир бўлган. Ўлим сабаби — ҳомила ичи инфекцияси, сепсис, миякомаси, мия шиши.
Таъкидланишича, чақалоқ 15 октябрь куни кечаси безовта бўлганида уни шифохонага олиб келиш ўрнига маҳаллий қишлоқ табибига олиб борилган, буни чақалоқнинг бувиси шифокорларнинг ёнида айтган. Чақалоқни ўз вақтида шифокорга кўрсатмасдан, уйида ушлаб туриш унинг аҳволи оғирлашишига сабаб бўлган.
Мурожаатда қайд қилинган «сентябрь—октябрь ойларида мазкур туғруқ комплексида жами 5 нафар гўдак ўлими содир бўлди», деган даъво ўз исботини топмаган. Бу муддат давомида туғруқ комплексида биронта ҳам гўдак ўлими қайд этилмаган.
Косон тумани тиббиёт бирлашмасининг навбатдан ташқари тиббий кенгашида мазкур вазият атрофлича муҳокама қилинган. Аниқланишича, туғруқ комплекси чақалоқлар бўлими бошлиғи, неонатолог Дилфуза Ҳасанова, доя Соҳиба Каримова, бош шифокор ўринбосари Давлат Султонов бу борада масъулиятсизлик қилган, яъни чақалоққа геповакс вакцинасини олмасдан туриб унинг уйга олиб кетилишига йўл қўйган.
Шу сабабли Дилфуза Ҳасанова ва Соҳиба Каримова эгаллаб турган вазифаларидан озод этилган, Давлат Султонов энг кам ойлик иш ҳақининг 30 фоизи миқдорида жаримага тортилган.
Изоҳ (0)