2019-yil 15-oktabr kuni soat 18:25 da Samarqand viloyati Favqulodda vaziyatlar boshqarmasi Navbatchi-dispetcherlik xizmatiga Samarqand shahri Al-Farobiy mahallasi hududidan oqib o‘tuvchi ariqdan suv toshayotganligi va ushbu hududda joylashgan aholi xonadonlari, shuningdek ichki ko‘chalarga chiqib ketganligi to‘g‘risida ma’lumot kelib tushgan. Bu haqda Favqulodda vaziyatlar vazirligi ”Daryo”ga ma’lum qildi.
Ma’lumotga asosan, voqea joyiga viloyat FVBdan jami yetti nafar harbiy xizmatchi, 12 nafar qutqaruvchi va ikkita maxsus texnika, shuningdek Samarqand shahar FVBdan jami ikkita texnika va to‘qqiz nafar qutqaruvchi jalb etilgan.
Olib borilgan tezkor amaliy tadbirlar natijasida Jarariq arig‘idan suvning toshishiga sabab bo‘lgan ariqqa tiqilib qolgan chiqindilar to‘liq tozalanib, xavf bartaraf etilgan.
Shuningdek, suv toshishi oqibatida hovlisiga va yashash xonadoniga oqova suvlari kirgan jami to‘rtta xo‘jalikdagi suvlar maxsus uskunalar yordamida chiqarib tashlangan.
O‘rganishlar natijasida suv toshqiniga sabab bo‘lgan omil aniqlandi. Jumladan, Samarqand shahar Suv xo‘jaligi bo‘limining ma’lumotiga ko‘ra, Al-Farobiy mahallasi hududidan oqib o‘tuvchi Jarariq arig‘i Samarqand tumani hududidan boshlanib, Xo‘ja-soat mahallasi orqali Samarqand shahriga oqib kiradi.
Ariqning umumiy uzunligi 15 kilometrni tashkil etib, yakuni Al-Farobiy mahallasi hududidan Siyob kanaliga quyiladi. Ariqning suv o‘tkazish qobiliyati soniyasiga bir metr kubni tashkil qiladi. So‘nggi 15—20 kun mobaynida mazkur ariqda suv bo‘lmagan. 2019-yil 15-oktabr kuni ariqqa soniyasiga 50—70 litr atrofida suv kelgan.
Biroq mahalliy aholi tomonidan ariqqa muntazam ravishda turli chiqindilar tashlanishi oqibatida, ular quvurlar, dyukerlarga tiqilib suv toshqinlariga sabab bo‘lgan.
Xususan, Al-Farobiy mahallasi hududidan oqib o‘tuvchi Jarariq arig‘i Siyob kanaliga quyilish yakunida temiryo‘l tarmog‘ining ostida joylashgan 1200 millimetrlik dyukerdan o‘tadi. Mazkur dyukerga 15-oktabr kuni jami 2—2,5 metr qalinlikda turli maishiy chiqindilar kelib tiqilgan. Natijada, mazkur dyukerdan suv o‘tmagan va sathi ko‘tarilib, suv toshqiniga sabab bo‘lgan. Ushbu joy taxminan ikki soatda to‘liq tozalangan va suv sathi pasayib, xavf bartaraf etilgan.
Izoh (0)