2019 йил 15 октябрь куни соат 18:25 да Самарқанд вилояти Фавқулодда вазиятлар бошқармаси Навбатчи-диспетчерлик хизматига Самарқанд шаҳри Ал-Фаробий маҳалласи ҳудудидан оқиб ўтувчи ариқдан сув тошаётганлиги ва ушбу ҳудудда жойлашган аҳоли хонадонлари, шунингдек ички кўчаларга чиқиб кетганлиги тўғрисида маълумот келиб тушган. Бу ҳақда Фавқулодда вазиятлар вазирлиги »Дарё»га маълум қилди.
Маълумотга асосан, воқеа жойига вилоят ФВБдан жами етти нафар ҳарбий хизматчи, 12 нафар қутқарувчи ва иккита махсус техника, шунингдек Самарқанд шаҳар ФВБдан жами иккита техника ва тўққиз нафар қутқарувчи жалб этилган.
Олиб борилган тезкор амалий тадбирлар натижасида Жарариқ ариғидан сувнинг тошишига сабаб бўлган ариққа тиқилиб қолган чиқиндилар тўлиқ тозаланиб, хавф бартараф этилган.
Шунингдек, сув тошиши оқибатида ҳовлисига ва яшаш хонадонига оқова сувлари кирган жами тўртта хўжаликдаги сувлар махсус ускуналар ёрдамида чиқариб ташланган.
Ўрганишлар натижасида сув тошқинига сабаб бўлган омил аниқланди. Жумладан, Самарқанд шаҳар Сув хўжалиги бўлимининг маълумотига кўра, Ал-Фаробий маҳалласи ҳудудидан оқиб ўтувчи Жарариқ ариғи Самарқанд тумани ҳудудидан бошланиб, Хўжа-соат маҳалласи орқали Самарқанд шаҳрига оқиб киради.
Ариқнинг умумий узунлиги 15 километрни ташкил этиб, якуни Ал-Фаробий маҳалласи ҳудудидан Сиёб каналига қуйилади. Ариқнинг сув ўтказиш қобилияти сониясига бир метр кубни ташкил қилади. Сўнгги 15—20 кун мобайнида мазкур ариқда сув бўлмаган. 2019 йил 15 октябрь куни ариққа сониясига 50—70 литр атрофида сув келган.
Бироқ маҳаллий аҳоли томонидан ариққа мунтазам равишда турли чиқиндилар ташланиши оқибатида, улар қувурлар, дюкерларга тиқилиб сув тошқинларига сабаб бўлган.
Хусусан, Ал-Фаробий маҳалласи ҳудудидан оқиб ўтувчи Жарариқ ариғи Сиёб каналига қуйилиш якунида темирйўл тармоғининг остида жойлашган 1200 миллиметрлик дюкердан ўтади. Мазкур дюкерга 15 октябрь куни жами 2—2,5 метр қалинликда турли маиший чиқиндилар келиб тиқилган. Натижада, мазкур дюкердан сув ўтмаган ва сатҳи кўтарилиб, сув тошқинига сабаб бўлган. Ушбу жой тахминан икки соатда тўлиқ тозаланган ва сув сатҳи пасайиб, хавф бартараф этилган.
Изоҳ (0)