Bosh prokuratura tomonidan “Daryo”ga ma’lum qilinishicha, ijtimoiy tarmoqlarda Toshkent shahar Mirobod tumani aholisi tomonidan ularning uylari oldida buzilgan bolalar o‘yin maydonchasini tiklashni talab qilganligi yuzasidan xabarlar tarqalgan.
Aniqlanishicha, Toshkent shahar hokimining 2015-yil 9-fevraldagi 96-sonli qaroriga asosan xususiy tadbirkorga Mirobod tumani, Amir Temur shoh ko‘chasi, 24-uy manzilida joylashgan mavjud binolarni ta’mirlash hamda o‘ziga tegishli hududning to‘rt sotix qismida qo‘shimcha ma’muriy va maishiy xizmat ko‘rsatish majmuasi qurishga ruxsat berilgan.
Mazkur qaror shaharsozlikka oid qonun hujjatlari talablariga zid bo‘lganligi bois, Toshkent shahar prokuraturasining protestiga asosan bekor qilingan, deyiladi Bosh prokuratura xabarida.
Shu bilan birga, Chilonzor tuman ma’muriy sudining 2018-yil 13-noyabrdagi hal qiluv qarori bilan ham “Baraka kommunal” xususiy uy-joy mulkdorlari shirkatining arizasi qanoatlantirilib, shahar hokimining yuqoridagi qarori haqiqiy emas deb topilgan.
Shundan so‘ng, bolalar o‘yin maydonchasi o‘rnida olib borilayotgan qurilish ishlari to‘xtatilgan, lekin hudud avvalgi holatiga keltirilmagan.
2019-yil 16-oktabr kuni Mirobod tumani prokuraturasi tomonidan Toshkent tumanlararo iqtisodiy sudiga xususiy tadbirkor zimmasiga qurilmani buzish va hududni avvalgi holatiga keltirish majburiyatini yuklash haqida da’vo arizasi kiritilgan.
Bosh prokuraturaning qayd etishicha, sud qarori qabul qilinib, holat qonuniy yechimini topgunga qadar mazkur masala kun tartibida bo‘ladi.
Izoh (0)