O‘zbekistonda dollar kursi joriy yil oxiriga borib 9895 so‘mgacha ko‘tarilishi taxmin qilinmoqda

O‘zbekiston aholisining fikricha, dollar narxi joriy yil oxiriga borib 9837—9895 so‘mgacha ko‘tarilishi mumkin. Bu haqda O‘zbekiston Markaziy bankining “2019-yil III chorakdagi aholi va tadbirkorlik subyektlarining inflyatsion kutilmalari” hisobotida ma’lum qilingan.

Markaziy bank tomonidan ma’lum qilinishicha, so‘rov ishtirokchilarining valyuta kursi bo‘yicha kutilmalari kelgusi davrlarda milliy valyutaning tebranuvchanlik darajasiga nisbatan noaniqlik ta’siri ostida shakllangan. Shunday qilib, aholining 2019-yil yakuniga ayirboshlash kursi bo‘yicha kutilmalari o‘rtacha 1 AQSh dollari uchun 9837 so‘mga, tadbirkorlar kutilmalari esa o‘rtacha 1 AQSh dollari uchun 9895 so‘mga teng bo‘lgan.

So‘rovda butun respublika bo‘ylab 900 nafar jismoniy shaxs hamda 375 nafar yuridik shaxs ishtirok etgan.

Eslatib o‘tamiz, joriy yilning avgust oyida dollar kursi keskin ko‘tarilgandi. Markaziy bank bu holatga ichki va tashqi omillar ta’sir ko‘rsatganini ma’lum qilgan. 20-avgustdan boshlab tijorat banklari naqd dollar sotishni boshladi.