Rossiyaning “Ural” basketbol jamoasi shifokori Sergey Datsun Vladivostokdan Novosibirsk shahriga uchayotgan samolyot bortida tobi qochgan O‘zbekiston fuqarosining jonini saqlab qoldi. Bu haqda jamoaning ijtimoiy tarmoqlardagi sahifalariga tayanib, “Rossiyskaya gazeta” xabar berdi.
Ma’lum qilinishicha, basketbol jamoasi Superliga bahsida ishtirok etib qaytayotgan bo‘lgan. Sportchilarga jamoa shifokori Sergey Datsun hamrohlik qilgan. Parvoz vaqtida samolyot uchuvchisi bortda shifokorlar bo‘lsa, bort kuzatuvchilariga murojaat qilishini so‘ragan. Jamoa shifokori bort kuzatuvchilariga murojaat qilgan.
O‘zbekiston fuqarosi bo‘lgan yo‘lovchi parvozning uchinchi soatida o‘zini yomon his qila boshlagan. Shifokorning so‘zlariga ko‘ra, uning hayoti xavf ostida bo‘lgan. Bort kuzatuvchilari yo‘lovchini jonlantirishga yordam bergan, bunga 40—50 daqiqa ketgan. Yo‘lovchining qonida qand miqdori pasayib ketgan, yurak urishi sezilmay qolgan, qon bosimi juda pasayib ketgan, hushini yo‘qotgan.
Shundan so‘ng, bort kapitani samolyotni Bratsk shahri aeroportiga qo‘ndirgan va tez yordam chaqirilgan. Shifokorlar samolyot bortida yo‘lovchini tekshirgan va unga parvozni davom ettirishga ruxsat bergan. Novosibirskka yetib borgach, yo‘lovchi samolyotni mustaqil tark etgan.
Eslatib o‘tamiz, 15-oktabr, seshanba kuni Farg‘onadan Moskvaga parvoz payti yo‘lovchilardan biri o‘zini yomon his qilgani uchun Uzbekistan Airways samolyoti Samarada favqulodda qo‘ngan edi. O‘zbekiston fuqarosi bo‘lgan yo‘lovchi 6-son Samara shahar kasalxonasiga joylashtirilgan. Keyinroq O‘zbekiston Tashqi ishlar vazirligi uning sog‘lig‘i barqarorlashgani va yaqin kunlarda unga ruxsat berilishi haqida xabar berdi.
Izoh (0)