Shavkat Mirziyoyevning joylarda amalga oshirilayotgan bunyodkorlik ishlari, yirik loyihalar bilan tanishish, xalq bilan muloqot qilish maqsadida Surxondaryo viloyatiga 2 kunlik tashrifi yakunlandi.
17-oktabr, payshanba kuni Surxondaryo viloyatiga tashrifini, an’anaga ko‘ra, Hakim at-Termiziy maqbarasi ziyoratidan boshlagan Prezident Angor tumanidagi “Angor Surxon g‘ururi” paxta-to‘qimachilik klasteri dalasida paxta hosilini ko‘zdan kechirdi, Denov tumanidagi Janubi-g‘arbiy maxsus harbiy okrugiga qarashli harbiy qismda bo‘lib, harbiy qismdagi sharoitlar bilan tanishdi. Shuningdek, ushbu tumandagi harbiylarning farzandlari uchun qurilgan bog‘chada yaratilgan sharoitlarni ko‘zdan kechirdi. Surxondaryoda qiymati 144 million dollarlik sement zavodi salohiyati bilan tanishdi.
18-oktabr, juma kuni esa Surxondaryo viloyati va tumanlar hokimlari, sektorlar rahbarlari, respublikadan kelgan mutasaddilar, faollar ishtirokida yig‘ilish o‘tkazib, hududlardagi holatga tanqidiy baho berdi. Har bir vazir, soha va tarmoqlar rahbarlariga bu yil yakunigacha va kelgusi yilda Surxondaryo uchun nimalar qilishini aniq yozib, viloyat hokimligiga taqdimot qilish bo‘yicha topshiriq berdi.
Shavkat Mirziyoyev safari davomida Termizdagi “Surxon ipagi” mas’uliyati cheklangan jamiyati faoliyati, “Oila” ilmiy-amaliy tadqiqot markazi Surxondaryo viloyati boshqarmasi faoliyati bilan ham tanishdi.
Shu bilan Prezident Surxondaryoga ikki kunlik safarini yakunlab, Toshkentga qaytib keldi.
Izoh (0)