Ўзбекистонда аҳоли учун аллергопаспорт шаклларини яратиш бўйича қонун лойиҳасини ишлаб чиқиш режалаштирилган. Бу ҳақда Соғлиқни сақлаш вазирлиги Тошкентда бўлиб ўтаётган болалар аллергологларининг I Халқаро илмий-амалий анжумани юзасидан берган хабарида маълум қилган.
Қайд этилишича, қонун лойиҳасига мутахассислар учун молекуляр аллергология бўйича мактаблар ўтказиш, беморлар ва уларнинг ота-оналари учун эса ўқув дастурларини ишлаб чиқиш, доимий равишда аҳоли учун семинарлар, йирик акциялар ўтказиш, шунингдек, озиқ-овқат аллергенлари молекулаларини аниқлаш масалаларини киритиш ҳам режалаштирилган.
Жаҳон Соғлиқни сақлаш ташкилоти маълумотларига кўра, дунё аҳолисининг 40 фоизи аллергик касалликларга чалинган. Ушбу кўрсаткичнинг муайян қисмини болалар ва ўсмирлар ташкил этади.
Хабар берилишича, Ўзбекистонда бугунги кунда 150 нафарга яқин аллерголог шифокор фаолият кўрсатмоқда. Президентнинг 2018 йил 11 майда қабул қилинган «Аллергик касалликларни профилактика қилиш, уларга ташхис қўйиш ва даволашни тубдан такомиллаштириш чора-тадбирлари тўғрисида»ги қарори соҳада ислоҳотларни бошлаб берган.
Мазкур қарор билан Республика илмий-ихтисослашган аллергология марказининг вазифалари ва фаолият йўналишлари кенгайган. Аҳоли орасида аллергик касалликлар билан касалланишни аниқлаш мақсадида марказ томонидан доимий популяцион эпидемиологик текширувлар ўтказиб борилади.
Республикада аллергик касалликларни эрта аниқлаш учун 18 ёшга тўлмаган ва хавф остида бўлган болалар орасида жорий йил январь—июль ойларида Болалар аллергологияси ва клиник иммунологияси соҳасида бир марталик умумдавлат акцияси ўтказилган. Акция уч босқичда олиб борилган.
Мазкур соҳада кадрлар тайёрлаш ва малакасини оширишга ҳам алоҳида эътибор қаратилмоқда, дейилади хабарда. Хусусан, 2019 йилдан бошлаб аллергологларнинг малакасини ошириш ва қайта ихтисослаштириш Республика илмий-ихтисослаштирилган аллергология маркази зиммасига юклатилган.
Аллергология соҳасидаги илмий-диагностик, таълим, инновацион ишлаб чиқаришни ривожлантириш, хорижий етакчи мутахассисларни жалб этиш, шунингдек, аллергик касалликларни ташхислаш ва даволашга молекуляр ва бошқа илғор усулларни жорий этган ҳолда кўрсатилаётган тиббий хизматлар сифатини янада ошириш мақсадида Тошкентда Молекуляр аллергология халқаро маркази ташкил этилган.
Изоҳ (0)