Қарши шаҳридаги «Табассум» маҳалласи Бунёдкорлик кўчасидаги 1/1, 1/2, 1/3, 1/4-сонли кўп қаватли турар жойлар атрофида бир пайтлари чиқиндихона мавжуд бўлган. Лекин ҳеч қандай сабабларсиз чиқиндихона ўрнида тадбиркорлар қурилиш ишларини бошлаб юборган. Бу эса аҳолининг жиддий эътирозларига сабаб бўлди. Кўп қаватли уйлар ёнидаги чиқиндихона бузиб ташланган. Бу ҳақда Nasafnews хабар бермоқда.
Нашрга мурожаат қилган фуқаролар маҳалладаги чиқиндилар уйларигача кириб кетаётганидан шикоят қилган.
Маълум бўлишича, чиқиндихона тўртта кўп қаватли уй учун мўлжалланган эди. Лекин Соғломлаштириш марказига яқин бўлгани учун тадбиркорлар томонидан бузиб ташланган. «Чиқинди жойига «Механизатор», «Геолог», «Мағзон», «Табассум» маҳалласидаги аҳоли ҳам чиқинди тўкиб кетади. Кимдир итнинг ўлигини, яна кимдир қўйнинг жасадини ҳам келтириб ташлаганига ўзим гувоҳ бўлганман», — дейди аҳоли вакилларидан бири.
Аҳоли вакилларининг сўзларига кўра, чиқинди тўкиладиган жой уйлар деразаларининг тагида жойлашган. Уйларни чивинлар ва пашшалар босиб кетади. Бу эса ёш болалар саломатлигидан ташвишга тушишга сабаб бўлмоқда.
«Қўй ва ҳайвонларнинг жасадини «Экотранс» олиб кетмайди. Баъзида ўн кунлаб ҳайвонларнинг ўлиги сасиб ётади. Чиқиндихона бузилганлиги сабабли ҳар ким хоҳлаган жойига чиқинди тўкиб кетаверади. Бу бўйича порталга ёздик. Прокуратурага ҳам мурожаат қилдик», — деган Гулноза Бекмуродова исмли маҳалла фуқароси.
Қайд этилишича, маҳаллада яшамайдиган бегона кишиларнинг ҳам чиқинди тўкиб кетиши сабабли чиқиндилар 2 кунга бормай катта уюм ҳосил қилади.
Аҳоли маҳаллада фаолият кўрсатаётган ширкатнинг фаолиятига ҳам эътироз билдирмоқда. Уларнинг сўзларига кўра, маҳалла раиси ва ширкат раҳбари бу масалаларга ечим топиш ўрнига оддий одамлар билан қўпол муомалада бўлган.
«Чиқиндилар уйимизгача кириб келаяпти. Атрофимиз кўриб турганингиздек, чиқиндихонага айланиб бўлган. Ҳар куни тозалашгани билан маҳаллада яшамайдиган айрим фуқароларнинг маданияти бўлмагандан кейин шундай ҳолат бўлади-да», — деган биринчи гуруҳ ногирони Шавкат Темиров.
Изоҳ (0)