AQSh Eronga kiberhujum uyushtirganini bildirmoqda. Forslar esa ushbu hujum amerikaliklarning tushida amalga oshganini ma’lum qildi

AQSh sentabr oxirida Saudiya Arabistoni neft zavodlariga uyushtirilgan hujumga javoban Eronga qarshi maxfiy kiberoperatsiya o‘tkazgan. Bu haqda Reuters agentligi AQSh hukumatidagi manbalariga tayanib xabar tarqatgan.

Kiberhujumlar seriyasi Eron siyosatining boshqa xorij davlatlardagi targ‘ibotiga qarshi qaratilgan. Pentagon ushbu hujumlar amalga oshirilganligi yuzasidan rasmiy axborot berishni istamagan.

“Siyosat hamda operativ xavfsizlik nuqtayi nazaridan kibermakondagi operatsiyalar, razvedka va rejalashtirilgan tadbirlarni OAVda muhokama qilmaymiz”, — deya ta’kidlagan AQSh mudofaa vazirligining rasmiy vakili Ellisa Smit.

O‘z navbatida Eron Axborot va kommunikatsiya texnologiyalari vaziri Muhammad Javod Azari Jahromiy sentabrda Vashington tomonidan Tehronga nisbatan kiberhujumlar uyushtirilganini inkor qilgan.

“Yo‘q, buni ular tushlarida amalga oshirishgan”, — deya kiberoperatsiyalar haqidagi xabarlarga izoh bergan Jahromiy.

14-sentabrda Saudi Aramco milliy neft kompaniyasiga tegishli ikki zavodga dronlar hujumi uyushtirilgan, portlashlar bo‘yicha mas’uliyatni Yamandagi xusiy-jangarilar o‘z zimmasiga olgandi. Dronlar hujumi natijasida yuzaga kelgan yong‘indan so‘ng dunyodagi eng katta neft eksportyorining sutkasiga 9,8 million barrel neftni qayta ishlash quvvati 5,7 million barrelga tushib ketgan.

AQSh hamda Saudiya Arabistoni ushbu hujumlar ortida Eron turganligini bildirgan. Amerika hamda Saudiya hukumati vakillarining so‘zlariga ko‘ra, hujum dronlar va raketalar yordamida amalga oshirilgan, xusiy-jangarilari ixtiyorida bu kabu zamonaviy qurollar bo‘lmagan. Tehron ushbu ayblovlar asossiz ekanligini qayd etgan.