Namangan viloyatida suv, ayniqsa, ichimlik suvi ta’minoti bilan bog‘liq jiddiy muammolar saqlanib qolmoqda — viloyat aholisining 37,8 foizi tizimli ichimlik suvi bilan ta’minlanmagan. Bu haqda senator Ro‘ziboy Saidov Senatning 23-yalpi majlisidagi chiqishi davomida aytib o‘tdi.
Senatorning so‘zlariga ko‘ra, mavjud ichimlik suvi olish inshootlarining aksariyati 46 foiz quvvat bilan ishlamoqda, suv quduqlarining 13 foizi ta’mirtalab hamda 8 foizi mutlaqo yaroqsiz holga kelgan.
Viloyatning ayrim hududlarida sug‘orish ishlari samaradorligini oshirish bilan bog‘liq mahalliy hokimliklar tashabbuslari mas’ul vazirlik va idoralar tomonidan chuqur o‘rganilmayapti. Chortoq tumanidagi har tomonlama eskirgan 6 ta nasos stansiyasi o‘rniga 2 ta zamonaviy stansiyani qurish va shu tariqa birinchidan, samarasiz xarajatlarga barham berish, ikkinchidan, 1850 gektar qo‘shimcha yer maydonlarini o‘zlashtirish hisobiga 3 mingdan ziyod yangi ish o‘rinlarini yaratish tashabbusi shular jumlasidandir.
Uy-joy kommunal xizmat ko‘rsatish vazirligi hamda boshqa mutasaddi tuzilmalar tomonidan zarur choralar o‘z vaqtida ko‘rilmagani oqibatida viloyatning ayrim hududlarida aholinining haqli e’tirozlariga sabab bo‘layotgan jiddiy muammolar yuzaga kelgan.
Masalan, aholisining 70 foizi ichimlik suvi bilan ta’minlanmagan To‘raqo‘rg‘on tumanida 24 kilometr uzunlikdagi suv tarmoqlarini tortish loyihasiga 30 milliard so‘m mablag‘ ajratilgan. “Biroq loyihani o‘z vaqtida, to‘liq amalga oshirish choralari ko‘rilmagani oqibatida, mablag‘ o‘zlashtirilgan bo‘lsa-da, belgilangan ishlar oxiriga yetkazilmagan — bugungi kunda mablag‘ ham yo‘q, ichimlik suvi ham olib kelinmagan”, — dedi senator.
Izoh (0)