Markaziy harbiy okrugiga qarashli “Kattaqo‘rg‘on” poligonida 10-oktabr kuni aralash tarkibdagi jangovar texnika va bo‘linmalar bilan amaliy mashg‘ulot o‘tkazildi, deb xabar beradi Markaziy harbiy okrug matbuot xizmati.
Uch kun davom etgan mashg‘ulotlarda, bir vaqtning o‘zida 30 ga yaqin o‘quv joylarida otish mashqlari tashkil etilgan. Tongda maxsus bo‘linmalar vertolyot aviatsiyasi orqali belgilangan joyga desantlashtirilgan. Artilleriya bo‘linmalari razvedka ma’lumotiga tayanib 15 km masofadagi, “zenit”chilar esa havodagi nishonlarni birin-ketin yakson qilgan.
“Jangovar tanklar mashq bajarish qoidasiga ko‘ra, yondan harakatlanib, 125 mmli to‘plardan otilgan “oskolkali parchalanuvchi”, “kumulyativ” hamda “zirhteshar” snaryadlar 1200 metr masofadagi mo‘ljalni yo‘q qildi”, — deyiladi xabarda.
Tankchilar bilan amaliy haydash mashg‘ulotlari ham tashkil etilgan. Harbiy xizmatchilar shtatdagi kichik kalibrli qurollardan jangovar tayyorgarlikning yangicha usullarini qo‘llagan holda mashq bajargan.
Izoh (0)