Наманган вилоятида сув, айниқса, ичимлик суви таъминоти билан боғлиқ жиддий муаммолар сақланиб қолмоқда — вилоят аҳолисининг 37,8 фоизи тизимли ичимлик суви билан таъминланмаган. Бу ҳақда сенатор Рўзибой Саидов Сенатнинг 23-ялпи мажлисидаги чиқиши давомида айтиб ўтди.
Сенаторнинг сўзларига кўра, мавжуд ичимлик суви олиш иншоотларининг аксарияти 46 фоиз қувват билан ишламоқда, сув қудуқларининг 13 фоизи таъмирталаб ҳамда 8 фоизи мутлақо яроқсиз ҳолга келган.
Вилоятнинг айрим ҳудудларида суғориш ишлари самарадорлигини ошириш билан боғлиқ маҳаллий ҳокимликлар ташаббуслари масъул вазирлик ва идоралар томонидан чуқур ўрганилмаяпти. Чортоқ туманидаги ҳар томонлама эскирган 6 та насос станцияси ўрнига 2 та замонавий станцияни қуриш ва шу тариқа биринчидан, самарасиз харажатларга барҳам бериш, иккинчидан, 1850 гектар қўшимча ер майдонларини ўзлаштириш ҳисобига 3 мингдан зиёд янги иш ўринларини яратиш ташаббуси шулар жумласидандир.
Уй-жой коммунал хизмат кўрсатиш вазирлиги ҳамда бошқа мутасадди тузилмалар томонидан зарур чоралар ўз вақтида кўрилмагани оқибатида вилоятнинг айрим ҳудудларида аҳолинининг ҳақли эътирозларига сабаб бўлаётган жиддий муаммолар юзага келган.
Масалан, аҳолисининг 70 фоизи ичимлик суви билан таъминланмаган Тўрақўрғон туманида 24 километр узунликдаги сув тармоқларини тортиш лойиҳасига 30 миллиард сўм маблағ ажратилган. «Бироқ лойиҳани ўз вақтида, тўлиқ амалга ошириш чоралари кўрилмагани оқибатида, маблағ ўзлаштирилган бўлса-да, белгиланган ишлар охирига етказилмаган — бугунги кунда маблағ ҳам йўқ, ичимлик суви ҳам олиб келинмаган», — деди сенатор.
Изоҳ (0)