O‘zbekiston sudyalari endi maxsus kiyimda ishlaydi. Buning uchun davlat budjetidan 500 mln so‘m sarflanadi

O‘zbekiston Senati sudyalarning maxsus kiyimi tavsifi va namunasini tasdiqladi. Bu haqda “Daryo” muxbiri xabar bermoqda.

Sudyalar maxsus kiyimi Prezident Shavkat Mirziyoyevning 2019-yil 17-yanvardagi 5635-sonli farmoniga muvofiq, Senat tomonidan Sudyalar Oliy Kengashi, Konstitutsiyaviy sud va Oliy sud bilan birgalikda namunalari ishlab chiqilgan. Qayd etishlaricha, bu borada nafaqat milliy qadriyatlar, balki AQSh, Germaniya, Fransiya, Buyuk Britaniya, Rossiya, Qozog‘iston va boshqa shu kabi xorijiy davlatlar tajribasi ham o‘rganib chiqilgan.

Respublika sudlari sudyalari uchun maxsus kiyim rangi to‘q-ko‘k bo‘lsa, Konstitutsiyaviy sud sudyalari uchun to‘q-olcha rangda va tarkibi 70 foiz jundan iborat bo‘ladi. Sudyalik maxsus kiyimi to‘plami — maxsus kiyim, manishka va ipak bo‘yinbog‘-plastron sudyalarning individual tana o‘lchamlari bo‘yicha, faqatgina sudyalik guvohnomasi asosida buyurtmaga qabul qilinishi mumkin.

Bundan tashqari, ta’kidlashlaricha, sudyalik maxsus kiyimining to‘plami uchun ishlatiladigan mato qishki va yozgi holati bo‘yicha o‘zgarishi mumkin, shuningdek, sudyalik maxsus kiyimining foydalanish muddati 2 yil etib belgilangan. O‘zbekistonda mazkur tadbirlarni amalga oshirish uchun davlat budjetidan 500 million so‘m qo‘shimcha xarajatlar talab qilinishi tegishli idoralar bilan kelishilgan.