Ukrainaning Lvov shahri aeroportiga favqulodda qo‘nishni amalga oshirgan An-12 samolyoti halokatga uchradi, deb xabar beradi Meduza.
Ukraina infratuzilma vaziri Vladislav Krikliy o‘zining Facebook’dagi sahifasiga yozishicha, falokat oqibatida halok bo‘lganlar bor. Samolyot bortida yetti nafar ekipaj a’zosi va bir nafar kuzatuvchi bo‘lgan.
To‘rt nafar fuqaro halok bo‘lganini yozgan Krikliy keyinroq postidagi ushbu jumlani olib tashlagan.
Favqulodda vaziyatlar bo‘yicha davlat xizmatining ma’lumotlariga ko‘ra, samolyot radarlardan soat 7:10 da yo‘qolib qolgan. Oradan 19 daqiqa o‘tib ekipaj a’zolaridan biri radio orqali favqulodda qo‘nish haqida xabar bergan. Soat 7:46 da An-12 samolyoti uchish-qo‘nish yo‘lagidan 1,5 kilometr naridan topilgan. Yong‘in alomatlari yo‘q.
Infratuzilma vazirligining ta’kidlashicha, samolyotning yoqilg‘isi tugab qolgan bo‘lishi mumkin. Ispaniyaning Viko shahridan Istanbul tomon uchayotgan ushbu reys Lvovda yoqilg‘i quyib olishi kerak bo‘lgan.
Izoh (0)