Rossiya nefti va gaziga nisbatan talabning keskin tushib ketishi va xomashyo xaridorlarning boshqa muqobil energiya manbalariga o‘tishi rossiyaliklarning 30 foizga qashshoqlashishiga olib keladi. Bunday fikrni Yevropa tiklanish va taraqqiyot bankining sobiq bosh iqtisodchisi va Rossiya iqtisodiyot maktabining sobiq rektori Sergey Guriyev bildirdi.
Iqtisodchining aytishicha, agar hozir neft keraksiz bo‘lib qolsa, rossiyaliklar 30 foizga qashshoqroq yashaydi. Ayni paytda Rossiya yalpi ichki mahsulotining 25—30 foizini neft va gazdan keladigan daromadlar tashkil qiladi. Biroq iqtisodiyotning asosiy qismini xizmatlar sohasi tashkil qiladi. Rivojlanish darajasi Rossiya bilan bir xil yoki undan yuqori bo‘lgan mamlakatlarda ham, masalan, AQShda ham xuddi shunday vaziyat yuzaga kelgan.
Guriyevning so‘zlariga ko‘ra, neft va gazga talab tushib ketgan taqdirda, Rossiya qashshoq mamlakatga aylanmaydi va qishloq xo‘jaligi, turizm, yuqori texnologiyalar kabi sohalarda rivojlanish potensialini saqlab qoladi. Bundan tashqari, neft va gaz kabi daromad manbasining yo‘qotilishi ijobiy tomonga ega bo‘lishi va Rossiya yoshlarini davlat xizmati yoki neft kompaniyalaridagi karyera haqida emas, balki boshqa sohalar, masalan, dasturlash sohasi haqida o‘ylashga majbur qilishi mumkin.
Neft va gaz sohasidan keladigan daromadlarning ulushi Rossiyaning 2018-yilgi budjetida 46 foizni tashkil qilgan.
Izoh (0)