Ngema kolleksiyasidagi avtomobillar turli mamlakatlardagi kolleksionerlarga 27 million AQSh dollaridan ziyodroq mablag‘ evaziga sotildi, deb xabar berdi Meduza.
Ekvatorial Gvineya vitse-preizdenti va hukmdorining o‘g‘li Teodoro Obiang Ngemaga tegishli lyuks klassidagi 25 avtomobil Shveysariyadagi auksionga qo‘yib sotildi.
Auksionni o‘tkazuvchi Bonhams savdo uyi superkarlarning umumiy narxini taxminan 18,5 million Shveysariya frankiga (18,7 million AQSh dollari atrofida) baholagandi, yakunda savdolardan 27 million AQSh dollaridan ko‘proq daromad ko‘rildi.
Jenevadagi golf-klubda taqdimotga qo‘yilgan lotlar orasida 7 ta Ferrari, uchta Lamborghini, beshta Bentley, shuningdek, Maserati va McLaren bor edi.
Eng diqqatga sazovor lot dunyo bo‘yicha soni to‘qqizta bo‘lgan Lamborghini Veneno Roadster supermashinasidir. Auksion uning sotuvidan kamida 5,2 million frank ishlab olmoqchi edi. Ushbu avtomobil kapotida Ngema o‘z ismi-sharifining bosh harflarini yozdirgan.
Yana bir katta lot sifatida oltinrang tusdagi Ferrari’ning LaFerrari poyga avtomobili e’tirof qilingan.
Avtomobillar Ekvatorial Gvineyani 1979-yildan beri boshqarib kelayotgan diktatorning o‘g‘li va merosxo‘ri Teodoro Obiang Ngema moliyaviy jinoyatlarda ayblanganidan keyin 2016-yilda Shveysariya sudi tomonidan musodara qilingan. 2019-yil fevralida Shveysariya prokuraturasi kichik-Ngemadan avtomobillarni musodara qilish evaziga ayblovlar olib tashlanishini ma’lum qilgandi.
Teodoro Ngema Obiang Mangu 1969-yilda tug‘ilgan. U mamlakat prezidenti Teodoro Obiang Ngema Mbasogoning birinchi nikohidan tug‘ilgan o‘g‘li. Ko‘p yillar davomida qishloq va o‘rmon xo‘jaligi vaziri lavozimida ishlagan, keyinchalik 2012-yilda mudofaa va xavfsizlik masalalariga javob beruvchi ikkinchi vitse-prezident lavozimini egallagan. 2016-yildan beri Ekvotrial Gvineya birinchi vitse-prezidenti hisoblanadi.
Izoh (0)