Нгема коллекциясидаги автомобиллар турли мамлакатлардаги коллексионерларга 27 миллион АҚШ долларидан зиёдроқ маблағ эвазига сотилди, деб хабар берди Meduza.
Экваториал Гвинея вице-преизденти ва ҳукмдорининг ўғли Теодоро Обианг Нгемага тегишли люкс классидаги 25 автомобиль Швейцариядаги аукционга қўйиб сотилди.
Аукционни ўтказувчи Bonhams савдо уйи суперкарларнинг умумий нархини тахминан 18,5 миллион Швейцария франкига (18,7 миллион АҚШ доллари атрофида) баҳолаганди, якунда савдолардан 27 миллион АҚШ долларидан кўпроқ даромад кўрилди.
Женевадаги голф-клубда тақдимотга қўйилган лотлар орасида 7 та Ferrari, учта Lamborghini, бешта Bentley, шунингдек, Maserati ва McLaren бор эди.
Энг диққатга сазовор лот дунё бўйича сони тўққизта бўлган Lamborghini Veneno Roadster супермашинасидир. Аукцион унинг сотувидан камида 5,2 миллион франк ишлаб олмоқчи эди. Ушбу автомобиль капотида Нгема ўз исми-шарифининг бош ҳарфларини ёздирган.
Яна бир катта лот сифатида олтинранг тусдаги Ferrari’нинг LaFerrari пойга автомобили эътироф қилинган.
Автомобильлар Экваториал Гвинеяни 1979 йилдан бери бошқариб келаётган диктаторнинг ўғли ва меросхўри Теодоро Обианг Нгема молиявий жиноятларда айбланганидан кейин 2016 йилда Швейцария суди томонидан мусодара қилинган. 2019 йил февралида Швейцария прокуратураси кичик-Нгемадан автомобилларни мусодара қилиш эвазига айбловлар олиб ташланишини маълум қилганди.
Теодоро Нгема Обианг Мангу 1969 йилда туғилган. У мамлакат президенти Теодоро Обианг Нгема Мбасогонинг биринчи никоҳидан туғилган ўғли. Кўп йиллар давомида қишлоқ ва ўрмон хўжалиги вазири лавозимида ишлаган, кейинчалик 2012 йилда мудофаа ва хавфсизлик масалаларига жавоб берувчи иккинчи вице-президент лавозимини эгаллаган. 2016 йилдан бери Эквотриал Гвинея биринчи вице-президенти ҳисобланади.
Изоҳ (0)