Mudofaa vaziri o‘rinbosari O‘zbekiston Regbi federatsiyasi vitse-prezidenti etib saylandi

Mudofaa vaziri o‘rinbosari general-mayor Azizbek Ikromov O‘zbekiston Regbi federatsiyasi vitse-prezidenti etib tayinlandi. Bu haqda Mudofaa vazirligi Axborot va ommaviy kommunikatsiyalar departamenti xabar berdi.

Joriy yilning 4-sentabr kuni O‘zbekiston Prezidenti rahbarligida 2020-yilda Yaponiyaning Tokio shahrida bo‘lib o‘tadigan Olimpiada o‘yinlariga tayyorgarlik ko‘rish, ommaviy sport va jismoniy tarbiyani rivojlantirish bo‘yicha olib borilgan ishlar natijadorligi va bu borada amalga oshiriladigan dolzarb vazifalarga bag‘ishlangan videoselektor bo‘lib o‘tgan edi.

Ushbu yig‘ilishda qator vazirlik va idoralar qatori Mudofaa vaziriligiga ham bir nechta topshiriqlar berilgandi.

24-sentabr, seshanba kuni Regbi federatsiyasi vitse-prezidenti etib tayinlangan Mudofaa vazirining o‘rinbosari general-mayor Azizbek Ikromov regbi sportini rivojlantirish, ham erkaklar, ham ayollar terma jamoalari uchun Parij Olimpiadasiga yo‘llanma olish bo‘yicha muhokama olib bordi.

Unda mavjud imkoniyatlar va bajarilishi lozim bo‘lgan muhim chora-tadbirlar ko‘rib chiqildi. Sport maydonlarining umumiy ahvoli va moddiy texnik bazasi o‘rganildi. Muhokama yakunida “Yo‘l xaritasi” ishlab chiqish va uni hayotga tadbiq etish bo‘yicha kelishib olindi.

General-mayor Azizbek Ikromov bir vaqtning o‘zida mudofaa vazirining Tarbiyaviy va mafkuraviy ishlar bo‘yicha o‘rinbosari hamdir.