OAV: Farg‘onalik blogerlarga muammolar haqida yozmaslik uqtirilmoqda, monopoliyalar haqida yozgan andijonlik blogerga tahdidlar bo‘lgan

“Sof.uz” nashri Farg‘onaning bir tumanida “qora ro‘mol o‘ragan ayollar darhol ishdan olinishi” haqida ogohlantirilgani, hududlardagi blogerlarga muammolar haqida yozmaslik uqtirilayotgani, mahalliy bozordagi monopoliyalar haqida yozayotgan andijonlik bir blogerga esa tahdidlar bo‘layotgani haqida xabar berdi. O‘zbekistonning vakolatli organlari mamlakatda rasman ro‘yxatga olingan OAVda e’lon qilingan ushbu ma’lumotlar yuzasidan hozircha biror izoh bergani yo‘q.

Quyida “Sof.uz”da e’lon qilingan xabar bilan to‘liq tanishish mumkin:

Amerikalik mashhur mutafakkir Noam Chomskiy ommani manipulyatsiya qilish usullari haqida yozar ekan avval muammo yaratib, keyin unga yechim taklif qilishni tilga oladi. Go‘yoki, fuqarolar orasida qandaydir qo‘poruvchi kuchlar borligi haqida vahima uyg‘otiladi va so‘ngra “ushbu kuchlarga aloqador, davlatga xavf soluvchi shaxslar” bitta-bitta daf etiladi.

Organ xodimlari ayol-qizlarning ro‘moli bilan shug‘ullanayotgan mahalda vodiydan qiziq xabarlar kelmoqda. Farg‘ona viloyatida yashovchi o‘zini oshkor qilmagan ayolning xabar berishicha, tuman xotin-qizlar bo‘limiga bir qancha ayollar to‘plangan va “qora ro‘mol o‘raganlar darhol ishdan olinishi” haqida ogohlantirilgan. Oqimlar haqida ham gap borgan, formasiz xodimlar portlash uyushtirishni rejalashtirgan qo‘poruvchilarni qo‘lga olganligini aytgan. Eslatib o‘tamiz: shu kunlarda mamlakatda portlash uyushtirishni rejalashtirgan qo‘poruvchi guruh qo‘lga olinganligi haqida biror yangilik chop etilgani yo‘q.

Farg‘onalik taniqli blogerlardan biri qayta-qayta chaqirtirilayotgani, muammolar haqida yozmaslik uqtirilayotgani haqida aytdi. U o‘z nomini aytishni xohlamadi, biroq saylov arafasida ijtimoiy muammolarni yozaversa, chora ko‘rilishidan ogohlantirilgan. Bu haqda samarqandlik taniqli ijodkor Karimberdi To‘ramurod ham Facebook sahifasida yozdi. Shuningdek, “tili chiqib qolgan” ba’zi blogerlarning ham yaqin-orada tanobi tortilishi mumkin.

Andijonlik bloger Otabek Nuriddinov Artel’ni qilgan tanqidi va bozordagi boshqa monopoliyalarni ijtimoiy tarmoqda yoritishi bilan tanilgan. Unga 19 sentyabr kuni telefon qilishib bozor mavzusini yoritsa, unga “bir gap bo‘lishi”dan ogohlantirishgan. “Bizda yana ko‘cha tizimi boshlandimi?” deb yozdi bloger. Shuningdek, u qo‘lida yetarli dalillar borligini ham ilova qildi.

“Sof.uz”da 22-sentabr kuni e’lon qilingan “Farg‘ona va Andijonda ‘qo‘rqit-qo‘rqit’lar yana boshlandimi?” sarlavhali xabardan