Misr shaharlarida g‘alayonlar boshlandi. Namoyishchilar prezident Abdulfattoh as-Sisi iste’fosini talab qilmoqda

Misrliklar Qohira va boshqa shaharlarga mamlakat prezidenti Abdulfattoh as-Sisi iste’fosini talab qilib chiqdi. Bu haqda “Kommersant” xabar berdi.

Norozilik namoyishi roliklari Facebook va boshqa ijtimoiy tarmoqlar orqali tarqatilmoqda. Ularda namoyishchilar 2011-yil inqilobi shiori — “Xalq tuzum qulashini istamoqda” so‘zlarini hayqirayotganini ko‘rish mumkin.

Norozilik namoyishlari “Zamalek” va “Ahli” jamoalari o‘rtasidagi futbol o‘yinidan so‘ng Misrni bundan bir necha yil avval tark etgan tadbirkor va aktyor Muhammad Ali chaqirig‘iga binoan tashkillandi. U bir necha yil davomida Misr armiyasi kontraktlarini bajarish bo‘yicha pudratchi bo‘lgan. Alining aytishicha, u oxirgi shartnomasi amalga oshirilgani uchun mablag‘ olmagan.

Ispaniyaga qochib ketganidan so‘ng Ali prezident va armiyani korrupsiyada aybladi. Uning rasmiylar ayblangan chiqishlari Facebook va Twitter’da millionlab marotaba ko‘rilgan. Shu haftada Muhammad Ali misrliklarni o‘yindan so‘ng o‘z noroziliklarini bildirish uchun bir soatga ko‘chaga chiqishga chaqirgan. Misr prezidenti bunga javoban Alini bo‘htonda aybladi.