O‘zboshimchalik bilan oltin qazish chog‘ida ikki kishi halok bo‘ldi, bir kishi jarohatlandi, deya xabar bermoqda O‘zbekiston Bosh prokuraturasi matbuot xizmati.
Fojia 17-sentabr kuni taxminan 18:30 da Samarqand viloyatining Paxtachi tumanida joylashgan, davlat zaxirasida bo‘lgan “Qoraqo‘ton” tog‘ hududidagi shaxtada sodir bo‘lgan.
Uch nafar oltin qazuvchini tog‘ toshi bosib qolgan — ikki nafari hodisa joyida vafot etgan bo‘lsa, uchinchi fuqaro tan jarohatlari bilan tuman tibbiyot birlashmasiga yotqizilgan.
“Mazkur holat yuzasidan tuman prokuraturasi tomonidan tergovga qadar tekshiruv harakatlari o‘tkazilmoqda”, — deyiladi Bosh prokuratura axborotida.
2014-yilda Qoraqo‘ton konida xizmat vazifasini bajarayotgan huquqni muhofaza qilish organi xodimi qasddan o‘ldirilgan edi. 2019-yil martida kondan 60 kilogramm qimmatbaho ruda toshlarini talon-toroj qilayotgan uch yigit qo‘lga olingan edi. Aprel oyida esa qimmatbaho ruda toshlarini talon-toroj qilish bilan shug‘ullanib kelgan, “Burqut” nomi bilan tanilgan butun boshli jinoiy to‘da fosh etilgan edi.
Izoh (0)