Ўзбошимчалик билан олтин қазиш чоғида икки киши ҳалок бўлди, бир киши жароҳатланди, дея хабар бермоқда Ўзбекистон Бош прокуратураси матбуот хизмати.
Фожиа 17 сентябрь куни тахминан 18:30 да Самарқанд вилоятининг Пахтачи туманида жойлашган, давлат захирасида бўлган «Қорақўтон» тоғ ҳудудидаги шахтада содир бўлган.
Уч нафар олтин қазувчини тоғ тоши босиб қолган — икки нафари ҳодиса жойида вафот этган бўлса, учинчи фуқаро тан жароҳатлари билан туман тиббиёт бирлашмасига ётқизилган.
«Мазкур ҳолат юзасидан туман прокуратураси томонидан терговга қадар текширув ҳаракатлари ўтказилмоқда», — дейилади Бош прокуратура ахборотида.
2014 йилда Қорақўтон конида хизмат вазифасини бажараётган ҳуқуқни муҳофаза қилиш органи ходими қасддан ўлдирилган эди. 2019 йил мартида кондан 60 килограмм қимматбаҳо руда тошларини талон-торож қилаётган уч йигит қўлга олинган эди. Апрель ойида эса қимматбаҳо руда тошларини талон-торож қилиш билан шуғулланиб келган, «Бурқут» номи билан танилган бутун бошли жиноий тўда фош этилган эди.
Изоҳ (0)