Repost nashri Toshkentdagi xotin-qizlar mehnat qiladigan mehnat bozorlari, xalq tilida aytganda “mardikor” bozoridan videoreportaj tayyorladi.
11 yildan beri ushbu mehnat bilan shug‘ullanayotgan Dilfuza Isaboyeva, jumladan, ushbu bozordagi “karyera”si haqida quyidagilarni bayon etdi:
“Bolalarimni boqish uchun shu yerga kelaman. Ish hajmi yuqori bo‘lgan joylarda ishlayman. Bu yerda yaxshi to‘lashadi. 50–60–70 ming so‘m 100 ming so‘mgacha kunlik daromad qilgan kunlarimiz ham bo‘lgan.
Ba’zan bir kun ishlab, bir hafta ishsiz yuramiz. Uyim yo‘q. Qiynalsam, kafe va qandolat korxonalarida ishlab kelaman. Bozorga oyda, yilda bir kelaman. Bu yerga hech kim zerikkanidan kelmaydi.
Bu yerda hammasi katta yoshlilar. Asosan o‘zbek, musulmon ayollar ishlaymiz. Hammalari ro‘zg‘or tebratish, bola-chaqa boqish uchun chiqishgan. “ ‘Fohishalik’ bilan shug‘ullanadiganlar yo‘q”.
Surayyo Ahmedova 8 yildan buyon “Mardikor bozor”da ishlaydi. Qornida to‘rt oylik homilasi borligiga qaramay turli darajadagi og‘ir yumushlarni bajarishga majbur.
“Hamma tashkilotlarga murojaat qildik. Me’yorlangan ish topib beringlar, biz ham qiynalyapmiz, deb aytdik. Uchta bolam bor, homiladorlik ta’tili ham bozorda o‘tmoqda. Uchastka shifokorimni topa olmayapman. Yana tug‘ishim sog‘lig‘imga zarar yetkazadi.
Hayotim davomida Xotin-qizlar qo‘mitasidan hech qanday yordam olmaganman. Bolalarim uchun harakat qilaman. Bu yerda har kuni u yoqdan bu yoqqa yuguramiz. Ba’zida mehnatimiz uchun pulimizni ham berishmaydi. Kecha shunday voqea bo‘ldi, sheriklarim bilan uchta bo‘lib ishladik, lekin mehnatimiz haqini ololmadik. Bu odamning ustidan ochiqchasiga kulish. Uysiz, hech vaqosiz yashayotgan odamlarmiz. Bizga ham normal ish bo‘lsa ishlaymiz. “Mardikor” bozoriga chiqish hammaga ham havas emas.
Ba’zida militsionerlar kelib, “Kimdir bu yo‘ldan o‘tishini” aytishadi. “O‘tsa-o‘tar, axir bu yerda tirikchilik qilyapmiz”, — desak. “Ketganidan keyin ishlayverasiz”, — deyishadi. Shu kuni ish “o‘ladi”. Ta’mir ishlariga ko‘p boramiz, tozalash ishlariga chiqamiz. Qurilishda g‘isht otib turishga ham boraveramiz. Bu o‘g‘il bola ishi, bu qizlarniki deb ajratmaymiz, ketaveramiz. Pulimizni olsak bo‘ldi. Erkaklar kam pul uchun ishlamaydi, biz boraveramiz”.
Katta yoshlilardan tashqari bu yerda yosh qizlar ham mehnat qiladi. Hilola ismli qiz ham yetti yildan beri “Feruza” mavzesidagi “mardikor” bozorida ishlar ekan. U onasi va o‘g‘li bilan ijarada yashaydi.
Tushlik ham qilmay faqat suv ichib ishlagan kunlarimiz bo‘lgan. Mehnatimizni hamma ham birdek qadrlayvermaydi. Zo‘rma-zo‘raki munosabatlar bo‘lmagan, ammo ayrim joylarda bizga mensimasdan bepisandlik bilan qarashadi”.
Repost videoreportajni tayyorlash uchun poytaxtdagi “Mardikor” bozorlarning 4 tasiga borgan. Bozorlarning birida ayollar jurnalistlar bilan muloqot qilishdan bosh tortgan. Avval kelgan OAV vakillari bilan suhbatdan keyin intervyu berganlarga tuman Ichki ishlar bo‘limi xodimlari tomonidan bosim o‘tkazilgan.
Izoh (0)