Repost нашри Тошкентдаги хотин-қизлар меҳнат қиладиган меҳнат бозорлари, халқ тилида айтганда «мардикор» бозоридан видеорепортаж тайёрлади.
11 йилдан бери ушбу меҳнат билан шуғулланаётган Дилфуза Исабоева, жумладан, ушбу бозордаги «карьера»си ҳақида қуйидагиларни баён этди:
«Болаларимни боқиш учун шу ерга келаман. Иш ҳажми юқори бўлган жойларда ишлайман. Бу ерда яхши тўлашади. 50–60–70 минг сўм 100 минг сўмгача кунлик даромад қилган кунларимиз ҳам бўлган.
Баъзан бир кун ишлаб, бир ҳафта ишсиз юрамиз. Уйим йўқ. Қийналсам, кафе ва қандолат корхоналарида ишлаб келаман. Бозорга ойда, йилда бир келаман. Бу ерга ҳеч ким зерикканидан келмайди.
Бу ерда ҳаммаси катта ёшлилар. Асосан ўзбек, мусулмон аёллар ишлаймиз. Ҳаммалари рўзғор тебратиш, бола-чақа боқиш учун чиқишган. « ‘Фоҳишалик’ билан шуғулланадиганлар йўқ».
Сурайё Аҳмедова 8 йилдан буён «Мардикор бозор»да ишлайди. Қорнида тўрт ойлик ҳомиласи борлигига қарамай турли даражадаги оғир юмушларни бажаришга мажбур.
«Ҳамма ташкилотларга мурожаат қилдик. Меъёрланган иш топиб беринглар, биз ҳам қийналяпмиз, деб айтдик. Учта болам бор, ҳомиладорлик таътили ҳам бозорда ўтмоқда. Участка шифокоримни топа олмаяпман. Яна туғишим соғлиғимга зарар етказади.
Ҳаётим давомида Хотин-қизлар қўмитасидан ҳеч қандай ёрдам олмаганман. Болаларим учун ҳаракат қиламан. Бу ерда ҳар куни у ёқдан бу ёққа югурамиз. Баъзида меҳнатимиз учун пулимизни ҳам беришмайди. Кеча шундай воқеа бўлди, шерикларим билан учта бўлиб ишладик, лекин меҳнатимиз ҳақини ололмадик. Бу одамнинг устидан очиқчасига кулиш. Уйсиз, ҳеч вақосиз яшаётган одамлармиз. Бизга ҳам нормал иш бўлса ишлаймиз. «Мардикор» бозорига чиқиш ҳаммага ҳам ҳавас эмас.
Баъзида милиционерлар келиб, «Кимдир бу йўлдан ўтишини» айтишади. «Ўтса-ўтар, ахир бу ерда тирикчилик қиляпмиз», — десак. «Кетганидан кейин ишлайверасиз», — дейишади. Шу куни иш «ўлади». Таъмир ишларига кўп борамиз, тозалаш ишларига чиқамиз. Қурилишда ғишт отиб туришга ҳам бораверамиз. Бу ўғил бола иши, бу қизларники деб ажратмаймиз, кетаверамиз. Пулимизни олсак бўлди. Эркаклар кам пул учун ишламайди, биз бораверамиз».
Катта ёшлилардан ташқари бу ерда ёш қизлар ҳам меҳнат қилади. Ҳилола исмли қиз ҳам етти йилдан бери «Феруза» мавзесидаги «мардикор» бозорида ишлар экан. У онаси ва ўғли билан ижарада яшайди.
Тушлик ҳам қилмай фақат сув ичиб ишлаган кунларимиз бўлган. Меҳнатимизни ҳамма ҳам бирдек қадрлайвермайди. Зўрма-зўраки муносабатлар бўлмаган, аммо айрим жойларда бизга менсимасдан беписандлик билан қарашади».
Repost видеорепортажни тайёрлаш учун пойтахтдаги «Мардикор» бозорларнинг 4 тасига борган. Бозорларнинг бирида аёллар журналистлар билан мулоқот қилишдан бош тортган. Аввал келган ОАВ вакиллари билан суҳбатдан кейин интервью берганларга туман Ички ишлар бўлими ходимлари томонидан босим ўтказилган.
Изоҳ (0)