Buxoroda 10 mingga yaqin daydi va qarovsiz it, mushuklar yo‘q qilingani ma’lum bo‘ldi

Buxoro viloyati hududiy obodonlashtirish boshqarmalari tomonidan o‘tgan davr mobaynida jami 9107 bosh daydi va qarovsiz holga kelgan it, mushuklar yo‘q qilib tashlangan, jasadlari “Vetsanchiqindi” zavodiga topshirilgan. Bu haqda Buxoro viloyati favqulodda vaziyatlar boshqarmasi ‘‘Daryo’’ga ma’lum qilgan.

Favqulodda vaziyatlar boshqarmasi va Buxoro viloyati hokimligi matbuot xizmati bilan hamkorlikda 17-sentabr “Kuz-qish mavsumida aholi o‘rtasida tabiiy va is gazlaridan zaharlanish, binolarda havo-gaz aralashmasi chaqnashi hamda quturish kasalligi bilan bog‘liq yuzaga kelishi mumkin bo‘lgan favqulodda vaziyatlarning oldini olish” mavzusida matbuot anjumani bo‘lib o‘tdi.

Matbuot anjumanida, hududiy obodonlashtirish boshqarmalari tomonidan o‘tgan davr mobaynida jami 9107 bosh daydi va qarovsiz holga kelgan it va mushuklar yo‘q qilinib, jasadlari “Vetsanchiqindi” zavodiga topshirilgani ma’lum qilindi.

Ma’lumot berilishicha, bugungi kunda viloyatda 110 ming it ro‘yxatga olingan. Ammo aholi tomonidan, ayniqsa, qishloq joylarda xonadonda saqlanayotgan itlar qarovsiz va daydi holga kelgan.

Shuningdek, kuzatuvlar tahliliga ko‘ra, daydi va qarovsiz qolgan hayvonlardan jabrlanganlarning aksariyat qismi (54%)ni 14 yoshgacha bo‘lgan bolalar tashkil etganligi qayd qilingan.

Avvalroq, Samarqandda ‘‘Sharq taronalari’’ arafasida itlar zaharlab o‘ldirilgani e’lon qilingan, keyinroq, bir mahallada 10 ta it o‘ldirilgani rad qilingan va it va mushuklarni zaharlab o‘ldirgan mansabdor shaxslar egallab turgan lavozimlaridan ozod etilgani ma’lum bo‘lgan.