Buxoroda firibgarlikda ayblangan tadbirkor ochlik e’lon qildi (video)

Facebook’dagi “Xalq fikri” guruhida Buxoro viloyatida tadbirkorlik bilan shug‘ullanuvchi R. Xodjayev O‘zbekiston Respublikasi Jinoyat Kodeksining 168-moddasiga (Firibgarlik) muvofiq sudlanayotgani va aybsiz ekanligini bildirib ochlik e’lon qilgani haqidagi post va video joylashtirildi.

Video ostidagi postda: “Buxorolik tadbirkor Rahim Xodjayev ochlik e’lon qildi... Rahim Xodjayev nohaqlik oqibatida o‘z joniga qasd qilishini aytdi... Uning qamalishida va xususiy mulkini tortib olinishida Buxoro hokimi O‘ktam Barnoyev bosh aybdor ekanini aytdi… Jurnalistlar va blogerlar haqiqat uchun kurashing...”

Videoda huquqni muhofaza qilish idoralari xodimlarining tadbirkorni sud zalidan tashqariga olib chiqib ketayotgani va uning telefon kamerasiga qarab: “O‘zimni o‘ldiraman, men ochlik e’lon qildim” deganini, uning qarindoshlari esa huquqni muhofaza qilish hamda sud organlaridan adolatli bo‘lishni so‘rayotganini eshitish mumkin.