Салоҳ Мертенсга, Клопп эса Анчелоттига қарши. «Наполи»—«Ливерпуль» тўқнашуви ҳақида

Футбол мухлислари орзиқиб кутган Европанинг энг нуфузли мусобақаси — Чемпионлар Лигаси 2019/20 йилги мавсуми 17 сентябрь, сешанба куни старт олади.

Қуръа гуруҳ босқичидаёқ бир нечта гранд клубларни бир-бирига рўбаро қилиб қўйди. Шу жумладан, эски танишлар — «Наполи» ҳамда «Ливерпуль»ни ҳам. Ўтган мавсумда ҳам ушбу клублар гуруҳ босқичида бир-бирига қарши ўйнаган эди. Ўшанда томонлар ўз майдонидаги ўйинларни бир хил ҳисобда ўз фойдасига ҳал этганди — 1:0. Гуруҳ босқичи сўнги туридан кейин иккала клубда ҳам 9 очко мавжуд эди. Аммо «Ливерпуль» тўплар нисбати эвазига плей-оффга йўл олганди. «Наполи» эса иштирокини Европа Лигасида давом эттиришга мажбур бўлганди. Бу сафар эса иккала жамоа яна бир гуруҳда. Фақат ПСЖ ҳамда «Црвена Звезда»сиз. Уларнинг ўрнини эса «Генк» ҳамда «Зальцбург» клублари билдирмасликка ҳаракат қилиб кўради. Хўш, жамоалар ушбу беллашувга қанчалик тайёр? Учрашув атрофида нималар юз бермоқда? Қуйида шу каби саволларга жавоб излаб кўрамиз.

«Ливерпуль»

«Ливерпуль» — Чемпионлар Лигасининг амалдаги ғолиби. Мерсисайд клуби ўтган йили «Наполи»га қарши сўнгги тур баҳсида Алиссонинг иккинчи бўлим охирларидаги қойилмақом сейви туфайли гуруҳдан чиқишни уддалаган эди. Бу сафар Алиссон «қизиллар»га ёрдам бера олмайди. Аммо Юрген Клоппа жамоасининг кайфияти аъло даражада. «Ливерпуль» Премьер Лигада 5 та турдан сўнг 15 очко жамғарган ҳолда яққол пешқадам бўлиб турибди. Клубнинг ҳужум триоси Салоҳ—Мане—Фирмино ўз ишини аллақачон бошлаб юборган. Ван Дейк бошчилигидаги ҳимоя қўрғони эса ўтган мавсумдагидек ишончли ҳаракат қилмоқда. Вейналдум ҳамда Фабиньо тандеми эса ўзига юклатилган вазифани аъло даражада уддаламоқда. Уларга жамоа сардори Жордан Ҳендерсон кўмакчи бўлиб турибди. Ҳаммасидан ҳам «Ливерпуль»нинг мавсумни аъло даражада бошлагани «Наполи»га катта қийинчилик туғдириши кутилаётган ҳолат, назаримизда. Сафарда ўйнашига қарамай Клопп шогирдларини ушбу учрашувнинг фаворити сифатида эътироф этса бўлади. Ҳаттоки, бу ҳолатга «қизиллар»нинг ўтган мавсум Чемпионлар Лигаси гуруҳ босқичидаги барча сафар ўйинларини мағлубият билан якунлагани ҳам таъсир кўрсатади деб ўйлаш фикридан йироқмиз.

«Наполи»

Карло Анчелотти жамоаси «Ливерпуль»дан фарқли ўлароқ мавсум стартини барқарор ўтказа олаётгани йўқ. А Сериянинг илк турида «Фиорентина» устидан 4:3 ҳисобида ғалаба қозонган «Наполи» 2-турда эса «Ювентус»га худди шу тарзда мағлуб бўлди. 3-турда эса «Сампдория» мағлуб этилди — 2:0. Марказий ҳимоя чизиги‘ учун «Рома»дан олиб келинган Костас Манолас ҳозирча ҳаддан ташқари мақтаб юборилаётган (клуб президенти томонидан) Калиду Кулибали билан бир-бирини тўлиқ тушуниб олмаганини шу иккала ўйиноқ тасдиқлаб турибди. Бу борада Карло отанинг олдида ҳали қилинадиган ишлар кўплиги ойдинлашади. Мухлислар клуб ярим ҳимоя ва ҳужум чизиғидан эса унчалик хавотир олмаса ҳам бўлаверади. Боиси Кальехон—Мертенс—Инсинье триосига энди мексикалик Ирвинг Лосано ҳам қўшилди. Ҳатто Лосано «Ювентус»га қарши захирадан майдонга тушибоқ гол урди. Марек Ҳамшик клубни тарк этгач, унинг ўрнини Пётр Зелиньски ҳамда Аллан билдирмасликка ҳаракат қилмоқда. Уларга ёрдамчи сифатида эса ёзги трансферлар вақтида Элиф Элмас олиб келинди. Умуман олганда, «Наполи»ни ўз майдонида ўйнаши ҳисобга олинса, «Ливерпуль»ни олдинда осон бўлмаган баҳс кутиб турганини таъкидлаш лозим.

Мураббийлар фикри

Улар бизга қарши икки ўйиндан сўнг мусобақани тарк этишига тўғри келди. Шундай экан, улар бизга қарши қаттиқ тайёргарлик кўрган. «Наполи» чиндан ҳам кучли жамоа. Бу биз учун осон ўйин бўлмайди. Неаполда яхши натижага эришишимиз учун етарли даражада кучли ўйин кўрсатишимиз лозим. Айнан шу нарсагина мени хавотирга солмоқдаЮрген Клопп, «Ливерпуль» бош мураббийи

Бизнинг мақсадимиз — гуруҳдан чиқиш. Европанинг энг кучли жамоасига қарши ўйнаймиз. Бу биз учун муҳим текширув бўлади. «Ливерпуль» катта ўсишга эришди. Ўтган мавсум жамоага ишонч тақдим этди. Аммо «Наполи» ҳам таркибни кучайтириб олди. Жамоам қандай ҳимояланиш ва ҳужум қилиш керак эканлигини яхши билади. «Наполи» ўз ўйинини кўрсатиши керак.

Карло Анчелотти, «Наполи» бош мураббийи

Қизиқарли фактлар

• «Наполи» Еврокубоклар доирасида бирор марта инглиз клубларига ўз майдонида мағлуб бўлмаган
• «Наполи»нинг бу борадаги кўрсаткичи: 5 та ғалаба, 1 та дуранг
• «Ливерпуль» ва «Наполи» расмий ўйинларда атиги 4 марта тўқнаш келган
• «Наполи» расмий ўйинларда «Ливерпуль»ни атиги 1 марта мағлуб этган (ўтган мавсум)
• «Ливерпуль» эса «Наполи» устидан икки марта ғалаба қозонган.
• Томонлар ўртасидаги битта баҳс дуранг билан якун топган

Тахминий таркиблар