Avtomobillarga 3 foizlik yig‘im ishlab chiqaruvchi tomonidan to‘lanishi belgilandi. 1-oktabrgacha mashinaga pul to‘laganlar bu vaziyatda qanday yo‘l tutadi? 

UzAuto Motors kompaniyasi matbuot xizmati tomonidan joriy yilning 1-oktabriga qadar dilerlik korxonasi bilan oldi-sotdi shartnomasini imzolagan, ammo hali avtomobilini olmagan xaridorlar bilan qo‘shimcha kelishuv imzolanishi hamda xaridor tomonidan mazkur to‘lov avtomobilni qabul qilib olish chog‘ida dilerlik korxonasiga to‘lanishi kerakligi haqida xabar berildi.

Adliya vazirligi ushbu holat bo‘yicha tushuntirish berdi.

O‘zbekiston Prezidentining 2019-yil 18-iyuldagi PQ–4397-son “O‘zbekiston Respublikasi avtomobil sanoatini jadal rivojlantirishga oid qo‘shimcha chora-tadbirlar to‘g‘risida”gi qarorida 2019-yil 1-oktabrdan boshlab mamlakatda ishlab chiqarilgan yangi avtotransport vositalarini sotib olganlik uchun yig‘im avtotransport vositalari ishlab chiqaruvchilari tomonidan to‘lanishi belgilangan.

Hozirda amalda bo‘lib turgan tartibga asosan yangi (avval foydalanilmagan) avtotransport vositalarini xarid qilganlik uchun to‘lov xarid narxining uch foizi avtotransport vositasi egasi (foydalanuvchi) tomonidan avtotransport vositasini Ichki ishlar vazirligi organlarida ro‘yxatdan o‘tkazilishi uchunto‘lanishi lozim.

Ya’ni, avval avtomobil xarid qilayotgan avtomobil egasi ushbu avtotransport vositasini ichki ishlar organlarida ro‘yxatdan o‘tkazayotganida uch foizlik yig‘imni to‘lab kelgan bo‘lsa, endilikda joriy yil 1-oktabrdan boshlab mamlakatda ishlab chiqarilgan avtotransport vositasi xarid qilinganlik uchun ushbu yig‘im avtotransport vositalari ishlab chiqaruvchilari tomonidan to‘lanadigan bo‘ldi.

“Fuqarolik kodeksiga muvofiq qonunlarda yoki shartnomada boshqacha tartib nazarda tutilgan bo‘lmasa, shartnoma taraflarning kelishuviga muvofiq o‘zgartirilishi va bekor qilinishi mumkin. Shartnoma tuzishga majbur qilishga esa yo‘l qo‘yilmaydi.

Shunga ko‘ra, shartnomada avtomobil uchun to‘lanadigan haq miqdorini o‘zgartirish nazarda tutilmagan bo‘lsa, u holda shartnoma shartlarini bir tomonlama o‘zgartirishga yo‘l qo‘yilmaydi. Buning uchun shartnoma bo‘yicha har ikkala tarafning roziligi talab etiladi, shartnoma tuzish burchi qonunda yoki olingan majburiyatda nazarda tutilgan hollar bundan mustasno.

Tanlov asosida diler korxonalar va sotib oluvchilar o‘rtasida tuzilgan shartnomalar tahlili shartnoma narxi faqatgina avtomobilga qo‘shimcha opsiyalar o‘rnatilganda o‘zgarishi mumkinligi belgilanganligini ko‘rsatdi.

Yuqoridagilarga ko‘ra, 1-oktabrga qadar dilerlik korxonasi bilan oldi-sotdi shartnomasini imzolagan, ammo hali avtomobilini olmagan xaridorlar bilan yangi avtotransport vositalarini sotib olganlik uchun uch foizdan iborat bo‘lgan yig‘imni dilerlik korxonasiga to‘latish bo‘yicha qo‘shimcha kelishuv tuzishga bo‘lgan bir tomonlama urinish qonun hujjatlariga ziddir”, — deyiladi Adliya vazirligi xabarida.