Toshkent harbiy okrugi “Chirchiq” dala-o‘quv maydonida O‘zbekiston va Qozog‘iston harbiylari ishtirokida hamkorlikdagi o‘quv mashg‘ulotlari o‘tkazildi. Bu haqda Mudofaa vazirligi axborot va ommaviy kommunikatsiyalar departamenti “Daryo”ga ma’lum qildi.
Mashg‘ulotlar rejasiga ko‘ra, chegaraoldi hududida g‘arazli maqsadlarni ko‘zlagan bir guruh noqonuniy qurollangan jangarilar mavjudligi haqida razvedka ma’lumotlari kelib tushgan. Ikki davlat harbiylaridan tarkib topgan maxsus bo‘linmaga qo‘yilgan vazifa jangari to‘da joylashgan hududni aniqlash va ularni yo‘q qilish. Dastlab yuqori qo‘mondonlikdan kelib tushgan buyruqqa asosan, bo‘linma komandirlari berilgan vazifani bajarish bo‘yicha chora-tadbirlar rejasini ishlab chiqdi. Qidiruv-razvedka ishlari tungi vaqtlarda amalga oshirildi.
Jangarilar joylashgan hudud aniqlanib, har tomondan qurshab olindi va birlashgan bo‘linma komandiri tomonidan aviatsiya hamda qo‘shimcha kuch vositalari yordamga chaqirildi.
Noqonuniy qurollangan jangarilar guruhini ishg‘ol qilishda jangovar harakatlar olib borishning zamonaviy usul va vositalari qo‘llandi. Birinchi bo‘lib vertolyot aviatsiyasi yordamida qo‘shimcha yordam kuchlari arqondan osilib tushish va qo‘nish usullari bilan shartli dushmanni har tomondan qurshab oldi. Shundan so‘ng bir vaqtning o‘zida zirhli texnikalar, minomyotchilar hisobi hamda barcha shaxsiy tarkib ishtirokida hujum boshlandi.
Shartli dushmanga ko‘mak berish uchun boshqa hududda harkatlanayotgan qo‘shimcha kuchlarga Mi-24 jangovar vertolyotlarida zarba berildi. Ishg‘ol qilish mashg‘ulotidan so‘ng yig‘ilganlarga parashut yordamida desantlashtirish amaliyoti namoyish qilindi.Maxsus-taktik o‘quv mashg‘ulotlari yakunlangach, Qozog‘iston vakillariga harbiy sohada amaliyotga joriy etilayotgan yangi ishlanmalar, jangovar texnika va qurol-aslahalar namoyish qilindi.
Dala-o‘quv maydonida harbiy xizmatchilarning jangovar tayyorgarligi va yashashi uchun yaratilgan sharoitlar ham qo‘shni mamlakat harbiy delegatsiyasi a’zolarini befarq qoldirmadi.
Izoh (0)