Axborot va ommaviy kommunikatsiyalar agentligida 9—13-sentabr kunlari bo‘lib o‘tadigan “Global to‘qimachilik kunlari Toshkent 2019” (Global Textile Days Tashkent 2019)ga bag‘ishlangan matbuot anjumani bo‘lib o‘tdi. Bu haqda Axborot va ommaviy kommunikatsiyalar agentligi xabar berdi.
Anjuman O‘zbekiston Prezidentining 2019-yil 12-fevraldagi “To‘qimachilik va tikuv-trikotaj sanoatini isloh qilishni yanada chuqurlashtirish va uning eksport salohiyatini kengaytirish chora-tadbirlari to‘g‘risida”gi qarorida belgilangan vazifalar ijrosini ta’minlashga qaratilgan.
Tadbirda “O‘zto‘qimasanoat” uyushmasi rahbarlari ishtirok etdi.
Mutasaddilarning ta’kidlashlaricha, “Global to‘qimachilik kunlari” kabi keng ko‘lamli tadbir Toshkentda birinchi marta tashkil etilmoqda. Forum doirasida to‘qimachilik, moda va mashinasozlik sanoatining so‘nggi yutuqlari namoyish etiladi.
“O‘zto‘qimasanoat” uyushmasi raisi Ilhom Haydarovning so‘zlariga ko‘ra, 2000-yili O‘zbekistonda paxta bo‘yicha ilk anjuman o‘tkazilgan bo‘lsa, 2019-yilda bu tadbir xalqaro miqyosda o‘tkazilmoqda. Bu esa O‘zbekiston xomashyo eksportchisidan yuqori qiymatli mahsulot yetkazib beruvchiga aylanganini anglatadi.
Bizning sanoat to‘la tashqi mahsulot yetkazib berishga yo‘naltirilgan. 2018-yil yakuniga ko‘ra, eksport 1,6 milliard dollardan oshgan. Ishonchimiz komilki, bu yil ushbu ko‘rsatkich ikki milliardga yetadi. Bunday o‘sish, albatta, e’tiborsiz qolmadi va paxta bo‘yicha xalqaro maslahat qo‘mitasi navbatdagi 8-yig‘ilishni Toshkentda o‘tkazishga qaror qildi. Tadbirlarda dunyoning yetakchi paxta yetishtiruvchi davlatlari – AQSh, Avstraliya, Xitoy, Hindiston, Pokiston va boshqa mamlakatlardan olimlar, ilmiy tadqiqotchilar va mutaxassislar ishtirok etishadi.Ilhom Haydarov, “O‘zto‘qimasanoat” uyushmasi raisi
Izoh (0)