“Toshshahartransxizmat”: Belarusdan keltirilgan elektrobus qisqa masofali yo‘nalishlardan biriga biriktiriladi

“Toshshahartransxizmat” AJ elektrobus olib kelingani haqidagi ma’lumotga izoh berdi.

“Toshshahartransxizmat” AJ va “Belarusning “Belkommunmash” kompaniyasi o‘rtasidagi o‘zaro memorandumga asosan poytaxt jamoat transporti harakati tarkibida elektrobuslarni sinov tariqasida yurgizish rejalashtirilgan edi.

Shunga muvofiq bir dona ana shu turdagi transport vositasi Toshkent shahriga keltirildi.

Bunga qadar esa “Toshshahartransxizmat” AJ tomonidan elektrobusni yo‘nalishga chiqarish bilan bog‘liq tashkiliy ishlar amalga oshirildi. Xususan, 2 ta joyda elektrobusni quvvatlash shoxobchasi o‘rnatildi.

“Yaqin kunlarda elektrobusni qisqa masofali yo‘nalishlardan biriga biriktirish rejelashtirilmoqda. Maxsus komissiya ushbu elektrobus bilan bog‘liq barcha holatlarni to‘liq o‘rganib chiqadi. Xususan, O‘zbekistonning issiq iqlimida elektrobusning harakatlanish imkoniyatlari, yo‘lovchilar sog‘lig‘iga uning ta’siri va boshqa jihatlar atroflicha tahlil qilinadi”, — deyiladi xabarda.

Eslatib o‘tamiz, avvalroq Toshkentga Belarusning futuristik elektrobusi olib kelingani haqida xabar berilgan edi.