Mustaqillik bayrami kuni Toshkentda 2000 dan ortiq bayroq o‘g‘irlandi

Mustaqillik kuni munosabati bilan Toshkent ko‘chalariga 6852 dona O‘zbekiston bayrog‘i o‘rnatildi. Bayram nishonlangan kechasi ularning 2037 tasi o‘g‘irlandi. Bu haqda poytaxt hokimligi matbuot xizmati “Daryo”ga xabar berdi.

Xususan, Bektemir tumanida 71 ta, Mirobodda — 207 ta, Olmazorda — 87 ta, Sergelida — 123 ta, Uchtepada — 76 ta, Yashnobodda — 60 ta, Chilonzorda — 560 ta, Shayxontohurda — 512 ta, Yunusobodda — 112 ta va Yakkasaroyda — 229 ta bayroq o‘g‘irlab ketilgan.

Qayd etilishicha, bitta bayroqning narxi 70 ming so‘mni tashkil etadi. Shunday qilib, bir kechada yetkazilgan zarar miqdori 142,6 million so‘mni tashkil etdi.

Avvalroq ijtimoiy tarmoqlarda noma’lum shaxslarning simyog‘ochlardagi bayroqlarni yechib olayotgani tasvirlangan fotosurat va videolar tarqalgan edi.