Qizil xoch Yamandagi aviazarba oqibatida 100 kishi halok bo‘lganini ma’lum qildi

Saudiya Arabistoni boshchiligidagi kaolitsiya tomonidan Yamanning Damar viloyatida joylashgan harbiy obyektlarga berilgan havo zarbalari oqibatida yuzdan ortiq odam halok bo‘ldi. Bu haqda Qizil Xoch bayonotiga tayanib, “Kommersant” xabar berdi.

Avvalroq, Yaman isyonchi harakatlari tomonidan boshqariladigan portalga asoslanib tarqatilgan xabarlarda aviazarba oqibatida 60 ga yaqin odam halok bo‘lgani aytilgandi.

Reuters agentligining ta’kidlashicha, zarba Damar viloyatida harbiy asirlar saqlanadigan qamoqxonaga berilgan.

Koalitsiya esa obyektda uchuvchisiz boshqariladigan uchish apparatlari va havo hujumidan mudofaa tizimlari saqlanganini ma’lum qildi. Bayonotda qayd etilishicha, “hujumni qaytarish choralari” oddiy fuqarolarni himoya qilish maqsadida amalga oshirilgan.

Eslatib o‘tamiz, Yamandagi harbiy-siyosiy mojaro 2014-yildan beri davom etib kelmoqda.