Саудия Арабистони бошчилигидаги каолиция томонидан Яманнинг Дамар вилоятида жойлашган ҳарбий объектларга берилган ҳаво зарбалари оқибатида юздан ортиқ одам ҳалок бўлди. Бу ҳақда Қизил Хоч баёнотига таяниб, «Коммерсанть» хабар берди.
Аввалроқ, Яман исёнчи ҳаракатлари томонидан бошқариладиган порталга асосланиб тарқатилган хабарларда авиазарба оқибатида 60 га яқин одам ҳалок бўлгани айтилганди.
Reuters агентлигининг таъкидлашича, зарба Дамар вилоятида ҳарбий асирлар сақланадиган қамоқхонага берилган.
Коалиция эса объектда учувчисиз бошқариладиган учиш аппаратлари ва ҳаво ҳужумидан мудофаа тизимлари сақланганини маълум қилди. Баёнотда қайд этилишича, «ҳужумни қайтариш чоралари» оддий фуқароларни ҳимоя қилиш мақсадида амалга оширилган.
Эслатиб ўтамиз, Ямандаги ҳарбий-сиёсий можаро 2014 йилдан бери давом этиб келмоқда.
Изоҳ (0)