Жорий йил август ойида Аҳмаджон А. жиддий хасталикка чалинган ўғли учун маблағ тўплашни илтимос қилиб, ижтимоий тармоқлар орқали барчага мурожаат қилди. Шу тариқа қиммат операция учун 24.596.000 тўплашга муваффақ бўлинди. Бу ҳақда ИИББ матбуот хизмати маълум қилди.
Telegram мессенжеридаги гуруҳлардан бирида мазкур эълонни кўриб қолган номаълум шахслар кўрсатилган рақамга қўнғироқ қилиб, картага пул ўтказишларини айтиб, тасдиқловчи код рақамини сўрайди. Шундан сўнг эълонга илова қилинган 16 рақамли карта кодидан фойдаланиб, юқоридаги суммани тўлиғича ўз ҳисоб рақамига ўтказиб олади.
Аҳмаджон Тошкент шаҳар ИИББга мурожаат қилди. Ушбу ҳолат юзасидан ЖКнинг 168-моддаси («Фирибгарлик») билан жиноят иши қўзғатилди.
ИИББ ходимлари томонидан мазкур жиноятни содир этганликда гумон қилиниб Фарғона вилоятида олдинроқ ўғирлик ва фирибгарлиги учун судланган 17 яшар Нуруллохон М. Қўлга олинди. Сўроқ чоғида у ушбу жиноятни 19 яшар Авазхон Ю. Билан бирга амалга оширганини тан олган. Унинг квартирасидан тинтув чоғи ашёвий далиллар тариқасида пластик карта, 700 доллар, 464.000 сўм ва Samsung А30 телефони топилган.
Тезкор тергов тадбирлари давомида ушбу шахслар юқоридагидек усуллар билан касал қизнинг отаси билан боғланиб, банк картасидаги 18.122.781 сўмни ўз ҳисобларига тушириб олгани аниқланди. Ҳозирда уларнинг шунга ўхшаш бошқа жиноятларга алоқадорлиги ва бошқа шериклари бор-йўқлиги текширилмоқда.
«Ҳурматли фуқаролар! Ҳеч қачон банк карталарингиз рақамлари, айниқса, тасдиқловчи кодларни нотаниш шахсларга маълум қилманг», — дейилади ИИББ хабарида.
Изоҳ (0)