26-avgustning e’tiborga molik yangiliklari — “Daryo” dayjestida.
O‘zbekiston Prezidenti 26-avgust, dushanba kuni Samarqand shahriga tashrif buyurdi. Davlat rahbari Imom Buxoriy maqbarasini ziyorat qildi, “Sharq taronalari” xalqaro musiqa festivali ochilishida ishtirok etdi, blogerlar va UNESCO bosh direktori bilan uchrashdi.
***
26-avgust kuni xalq deputatlari Andijon shahar Kengashining navbatdan tashqari sessiyasida Dilmurod Rahmatullayev lavozimidan ozod etilgani ma’lum qilindi.
Andijon viloyati hokimi Shuhrat Abdurahmonov ishtirokida o‘tkazilayotgan mazkur yig‘ilishda Bahromjon Haydarov vaqtinchalik hokim vazifasini bajaruvchi sifatida tanishtirildi.
***
Markaziy bank “Tijorat banklarida jismoniy shaxslar bilan valyuta ayirboshlash operatsiyalarini amalga oshirish tartibi to‘g‘risidagi nizomga o‘zgartirish va qo‘shimchalar kiritish haqida” qaror loyihasini tayyorladi.
Hujjat loyihasida Markaziy bank boshqaruvining 2018-yil 28-apreldagi 16/9-son qarori bilan tasdiqlangan Tijorat banklarida jismoniy shaxslar bilan valyuta ayirboshlash operatsiyalarini amalga oshirish tartibi to‘g‘risidagi nizomga o‘zgartirish va qo‘shimchalar kiritish nazarda tutilgan.
***
Qashqadaryoda YPX xodimi Captiva haydovchisi tomonidan haqoratlandi. Haydovchi YPX xodimini haqoratlab, telefon orqali syomka qilingan videoni ijtimoiy tarmoqlarda tarqatdi va IIB xodimini obro‘sizlantirishga urindi.
Ma’lum bo‘lishicha, qamashilik haydovchi Z.A. 2019-yil 2-avgust kuni soat 10:41 da M-39 avtomobil yo‘lining Kitob tumani Qaynar qishlog‘i hududidan o‘tuvchi 1148-kilometrida o‘z boshqaruvchidagi Captiva avtomobilini belgilangan tezlik 70 kilometr bo‘lgan yo‘lda 77 kilometr tezlikda boshqarib keladi. Shunda hududda o‘z xizmat vazifasini olib borayotgan YPX xodimi Mirali Doniyorov haydovchini to‘xtatadi. Va qoidabuzarligini tushuntirib, ma’muriy bayonnoma rasmiylashtirishga kirishadi. Haydovchi Z.A. esa YPX xodimining ish faoliyatiga faol qarshilik ko‘rsatib, fuqarolarda IIB xodimiga ishonchsizlik uyg‘otishni da’vat qiluvchi videosyomka qiladi. Videosyomka jarayonida YPX xodimiga “ustingizdagi formani yechib, ayollar kiyimini kiyib oling” degan haqoratli so‘zlar aytadi.
***
UzAuto Motors kompaniyasi Rossiya bozoriga avtomobillar eksportini qayta yo‘lga qo‘ydi.
Sotuvlar 25-avgustdan boshlandi. Ijtimoiy tarmoqlarda qoldirilgan izohlardan yangi narxlar ko‘pchilikni ajablantirganini payqash mumkin.
Jumladan, bir yil avval Rossiyada 439 ming rubl boshlang‘ich narx bilan eng arzon xorijiy avtomobil bo‘lgan Ravon R2 endi 646 ming rublga baholanmoqda. 449 ming rubl turgan Ravon R3 Nexia uchun 670 ming rubl narx belgilangan.
***
Mercedes-Benz Germaniyaning shimoli-g‘arbidagi Alxorn shahrida joylashgan yopiq aerodromda bir necha mingta avtomobillar saqlamoqda.
Nemis jurnalistlari tomonidan e’lon qilingan videolavhada yaroqsiz “Mersedeslar” “qabristonida” asosan GLE va GLS krossoverlari saqlanadi. Ammo, u yerda C va E modeldagi bir necha kupelar va hatto S-klassdagi Mercedes-Maybach sedani ham ko‘zga tashlangan.
Izoh (0)