26 августнинг эътиборга молик янгиликлари — «Дарё» дайжестида.
Ўзбекистон Президенти 26 август, душанба куни Самарқанд шаҳрига ташриф буюрди. Давлат раҳбари Имом Бухорий мақбарасини зиёрат қилди, «Шарқ тароналари» халқаро мусиқа фестивали очилишида иштирок этди, блогерлар ва UNESCO бош директори билан учрашди.
***
26 август куни халқ депутатлари Андижон шаҳар Кенгашининг навбатдан ташқари сессиясида Дилмурод Раҳматуллаев лавозимидан озод этилгани маълум қилинди.
Андижон вилояти ҳокими Шуҳрат Абдураҳмонов иштирокида ўтказилаётган мазкур йиғилишда Баҳромжон Ҳайдаров вақтинчалик ҳоким вазифасини бажарувчи сифатида таништирилди.
***
Марказий банк «Тижорат банкларида жисмоний шахслар билан валюта айирбошлаш операцияларини амалга ошириш тартиби тўғрисидаги низомга ўзгартириш ва қўшимчалар киритиш ҳақида» қарор лойиҳасини тайёрлади.
Ҳужжат лойиҳасида Марказий банк бошқарувининг 2018 йил 28 апрелдаги 16/9-сон қарори билан тасдиқланган Тижорат банкларида жисмоний шахслар билан валюта айирбошлаш операцияларини амалга ошириш тартиби тўғрисидаги низомга ўзгартириш ва қўшимчалар киритиш назарда тутилган.
***
Қашқадарёда ЙПХ ходими Captiva ҳайдовчиси томонидан ҳақоратланди. Ҳайдовчи ЙПХ ходимини ҳақоратлаб, телефон орқали сёмка қилинган видеони ижтимоий тармоқларда тарқатди ва ИИБ ходимини обрўсизлантиришга уринди.
Маълум бўлишича, қамашилик ҳайдовчи З.А. 2019 йил 2 август куни соат 10:41 да М-39 автомобиль йўлининг Китоб тумани Қайнар қишлоғи ҳудудидан ўтувчи 1148-километрида ўз бошқарувчидаги Captiva автомобилини белгиланган тезлик 70 километр бўлган йўлда 77 километр тезликда бошқариб келади. Шунда ҳудудда ўз хизмат вазифасини олиб бораётган ЙПХ ходими Мирали Дониёров ҳайдовчини тўхтатади. Ва қоидабузарлигини тушунтириб, маъмурий баённома расмийлаштиришга киришади. Ҳайдовчи З.А. эса ЙПХ ходимининг иш фаолиятига фаол қаршилик кўрсатиб, фуқароларда ИИБ ходимига ишончсизлик уйғотишни даъват қилувчи видеосёмка қилади. Видеосёмка жараёнида ЙПХ ходимига «устингиздаги формани ечиб, аёллар кийимини кийиб олинг» деган ҳақоратли сўзлар айтади.
***
UzAuto Motors компанияси Россия бозорига автомобиллар экспортини қайта йўлга қўйди.
Сотувлар 25 августдан бошланди. Ижтимоий тармоқларда қолдирилган изоҳлардан янги нархлар кўпчиликни ажаблантирганини пайқаш мумкин.
Жумладан, бир йил аввал Россияда 439 минг рубл бошланғич нарх билан энг арзон хорижий автомобиль бўлган Ravon R2 энди 646 минг рублга баҳоланмоқда. 449 минг рубл турган Ravon R3 Nexia учун 670 минг рубл нарх белгиланган.
***
Mercedes-Benz Германиянинг шимоли-ғарбидаги Алхорн шаҳрида жойлашган ёпиқ аэродромда бир неча мингта автомобиллар сақламоқда.
Немис журналистлари томонидан эълон қилинган видеолавҳада яроқсиз «Мерседеслар» «қабристонида» асосан GLE ва GLS кроссоверлари сақланади. Аммо, у ерда C ва E моделдаги бир неча купелар ва ҳатто S-классдаги Mercedes Maybach седани ҳам кўзга ташланган.
Изоҳ (0)