Moskvada “Toshkent kunlari” o‘tkaziladi

Toshkent shahar hokimligi delegatsiyasi Moskvada bo‘lib turibdi. Bu haqda hokimlik matbuot xizmati ma’lum qildi.

Bektemir tuman hokimi Shohruh Mamajonov boshchiligidagi delegatsiya Yunusobod va Sergeli tumanlari hokim o‘rinbosarlari, Iqtisodiyot va sanoat bosh boshqarmasi xodimlari hamda tadbirkorlardan tashkil topgan.

Delegatsiya a’zolari dastlab Moskva hukumati tashqi iqtisodiy va xalqaro aloqalar departamentida bo‘lib o‘tgan uchrashuvda ishtirok etdi. O‘zaro muloqot davomida tomonlar Moskva shahrida “Toshkent kunlari”ni o‘tkazish masalasini muhokama qildi.

Hokimlik delegatsiyasi a’zolari Moskva shahar Savdo-sanoat palatasida ham bo‘lib, uning mutasaddilari bilan uchrashdi. Mazkur SSP vitse-prezidenti Suren Vardanyan toshkentlik tadbirkorlarga Moskvadagi biznes muhiti, iqtisodiy shart-sharoitlar borasida atroflicha ma’lumot berdi. Ikki tomon vakillari o‘zaro hamkorlik yo‘nalishlari haqida fikr almashishdi.