“Sayohat barcha uchun” loyihasining ilk kuni haqida (foto va video)

Turizmni rivojlantirish davlat qo‘mitasi ilk marotaba “Sayohat barcha uchun” loyihasini amalga oshirdi. Imkoniyati cheklangan shaxslarning yurtimiz bo‘ylab sayohatlarini tashkillashtirishni maqsad qilgan mazkur loyihaning ilk manzili Samarqand shahri bo‘ldi.

Birinchi marotaba amalga oshirilayotgan savobli loyihada “Daryo” muxbiri Feruz Muhammad ham ishtirok etdi.

Ikki kunga mo‘ljallangan sayohatda qirqdan ortiq nogironligi bo‘lgan shaxslar hamda ularning kuzatuvchilari Toshkent shahridan yo‘lga chiqdi.

Sayohatga chiqqanlar orasida nogironlikni tan olmasdan jamiyatda o‘z o‘rnini topganlar talaygina edi. Misol uchun, ularning ko‘pchiligi sho‘ba korxonasi direktori, tadbirkor, chempion sportchi, ishchi, hunarmand, xullas, jamiyatning ko‘plab sohalarida faoliyat yuritayotgan insonlardir.

Feruz Muhammadning ma’lum qilishicha, Toshkentdan yo‘lga chiqqan avtobus loyiha ishtirokchilari, ya’ni imkoniyati cheklangan shaxslar ixtiyorida bo‘ldi. Ularning ko‘ngliga qaraldi, har qanday xohishlari bajarib borildi. Misol uchun, dastavval Jizzax viloyatining Sharof Rashidov tumaniga qarashli ovqatlanish maskanida to‘xtagan avtobus yana shu tumandagi yaylovda ham to‘xtab o‘tdi.

Yaylovda to‘xtashdan maqsad esa ot va tuyalarni ko‘rish edi. Ko‘plar uchun uy, dala hayvonlari hisoblangan ot va tuyalarni ushbu loyiha ishtirokchilari katta hayrat, hayajon bilan tomosha qilishdi. Suratlarga ham tushishdi. Umrida ilk marotaba ot va tuyani ko‘rish-ku mayli, ularni minib ko‘rgan, sayohat qilganlar ham bo‘ldi. Video reportajda barchasi muhrlangan.

Shu o‘rinda Turizmni rivojlantirish davlat qo‘mitasining bizga sherik bo‘lgan vakillariga alohida minnatdorchilik bildirishni, ularning ezgu sa’y-harakatini a’lo darajada baholashni istardik. Negaki ushbu kunda ular haqiqatan jonbozlik ko‘rsatishdi. “Turizmchilar”ga balli.

“Sayohat barcha uchun” loyihasi ishtirokchilarining ilk ziyoratgohi Imom al-Buxoriy maqbarasi bo‘ldi. Bu yerda maqbara tarixi bilan tanishildi, jamoa bo‘lib duo o‘qildi.

Sayohatning birinchi kuni shu bilan yakunlanmadi, biz dastavval “Registon palase” mehmonxonasiga joylashib, undan so‘ng aynan sayohatchilar uchun tashkillashtirilgan ajoyib musiqiy kechada mehmon bo‘ldik. Sayohat ishtirokchilari ushbu kechada mazza qilib raqsga tushdi, samarqandcha taomlardan, noz-u ne’matlardan bahramand bo‘lishdi. Ajoyib!

Ushbu kechada so‘zga chiqqan “Sayohat barcha uchun” loyihasi muallifi, Turizmni rivojlantirish davlat qo‘mitasi raisi vazifasini vaqtincha  bajaruvchi Abdulaziz Aqqulov ushbu loyiha haqida quyidagi fikrlarni aytib o‘tdi.

“Sahoyat barcha uchun” loyihasining asosiy maqsadi siz kabi qadrdonlarni ham jamiyatning to‘laqonli a’zosi sifatida ko‘rish. Bu loyihani keyinchalik ham davom etishini ta’minlaymiz.

Turizmni rivojlantirish davlat qo‘mitasida barcha imkoniyatlar borki, ertaga siz kabi do‘stlarimizga tegishli sharoitlarni yaratish, ya’ni sayohat qiladigan bo‘lsa, aravachalar yurishi uchun moslashtirilgan sharoitlarning bo‘lishi, avtobuslardan chiqib-tushishda imkoniyatlarni hisobga olishimiz kerak. Sizlarni aylantirganimizda o‘zimizning kamchiliklarimizni ko‘ramiz, bu biz uchun dars bo‘ladi.

Biz bu sayohatda OAVlarini ham jalb qilganmiz, ular bizning sayohatimizni ko‘rsatishlari uchun emas, balki sayohat davomida sizlarda tug‘ilayotgan noqulayliklarni, kamchiliklarni ko‘rsatib berish uchun jalb qilingan.

Ikkinchi maqsad esa aksiyani ko‘rib, qiziqish bildirib, bizga sherik bo‘laman degan tashkilotlar va homiylarga chaqiriq beramizki, aksiya davomida nodavlat-notijorat tashkilotining hisob raqamiga kelib tushadigan mablag‘lar evaziga ushbu loyihani doimiy o‘tkazishni ta’minlaymiz.

Ushbu mablag‘larning 50 foizi sayohatlarga, 25 foizi imkoniyati cheklangan shaxslarni ish bilan ta’minlashga, yana 25 foizi ushbu insonlar uchun aravachalar yoki boshqa uskunalar sotib olishga yo‘naltirilgan. Bugungi boshlagan xayrli aksiyamizda ishtirok etganingiz uchun barchangizga minnatdorchilik bildiramiz.

Abdulaziz Aqqulov, Turizmni rivojlantirish davlat qo‘mitasi raisi vazifasini vaqtincha  bajaruvchi

“Lazer shou” tomoshasidan so‘ng tungi soat 12 larga yaqin “Registon palace” mehmonxonasiga yo‘l oldik. “Sayohat barcha uchun” loyihasining ilk kuni shunday unutilmas taassurotlar, qiziq voqealar va mazmunli suhbatlar bilan yakunlandi.