«Саёҳат барча учун» лойиҳасининг илк куни ҳақида (фото ва видео)

Туризмни ривожлантириш давлат қўмитаси илк маротаба «Саёҳат барча учун» лойиҳасини амалга оширди. Имконияти чекланган шахсларнинг юртимиз бўйлаб саёҳатларини ташкиллаштиришни мақсад қилган мазкур лойиҳанинг илк манзили Самарқанд шаҳри бўлди.

Биринчи маротаба амалга оширилаётган савобли лойиҳада «Дарё» мухбири Феруз Муҳаммад ҳам иштирок этди.

Икки кунга мўлжалланган саёҳатда қирқдан ортиқ ногиронлиги бўлган шахслар ҳамда уларнинг кузатувчилари Тошкент шаҳридан йўлга чиқди.

Саёҳатга чиққанлар орасида ногиронликни тан олмасдан жамиятда ўз ўрнини топганлар талайгина эди. Мисол учун, уларнинг кўпчилиги шўба корхонаси директори, тадбиркор, чемпион спортчи, ишчи, ҳунарманд, хуллас, жамиятнинг кўплаб соҳаларида фаолият юритаётган инсонлардир.

Феруз Муҳаммаднинг маълум қилишича, Тошкентдан йўлга чиққан автобус лойиҳа иштирокчилари, яъни имконияти чекланган шахслар ихтиёрида бўлди. Уларнинг кўнглига қаралди, ҳар қандай хоҳишлари бажариб борилди. Мисол учун, даставвал Жиззах вилоятининг Шароф Рашидов туманига қарашли овқатланиш масканида тўхтаган автобус яна шу тумандаги яйловда ҳам тўхтаб ўтди.

Яйловда тўхташдан мақсад эса от ва туяларни кўриш эди. Кўплар учун уй, дала ҳайвонлари ҳисобланган от ва туяларни ушбу лойиҳа иштирокчилари катта ҳайрат, ҳаяжон билан томоша қилишди. Суратларга ҳам тушишди. Умрида илк маротаба от ва туяни кўришку майли, уларни миниб кўрган, саёҳат қилганлар ҳам бўлди. Видео репортажда барчаси муҳрланган.

Шу ўринда Туризмни ривожлантириш давлат қўмитасининг бизга шерик бўлган вакилларига алоҳида миннатдорчилик билдиришни, уларнинг эзгу саъй-ҳаракатини аъло даражада баҳолашни истардик. Негаки ушбу кунда улар ҳақиқатан жонбозлик кўрсатишди. «Туризмчилар»га балли.

«Саёҳат барча учун» лойиҳаси иштирокчиларининг илк зиёратгоҳи Имом ал-Бухорий мақбараси бўлди. Бу ерда мақбара тарихи билан танишилди, жамоа бўлиб дуо ўқилди.

Саёҳатнинг биринчи куни шу билан якунланмади, биз даставвал «Registon palace» меҳмонхонасига жойлашиб, ундан сўнг айнан саёҳатчилар учун ташкиллаштирилган ажойиб мусиқий кечада меҳмон бўлдик. Саёҳат иштирокчилари ушбу кечада мазза қилиб рақсга тушди, самарқандча таомлардан, нозу неъматлардан баҳраманд бўлишди. Ажойиб!

Ушбу кечада сўзга чиққан «Саёҳат барча учун» лойиҳаси муаллифи, Туризмни ривожлантириш давлат қўмитаси раиси вазифасини вақтинча  бажарувчи Абдулазиз Аққулов ушбу лойиҳа ҳақида қуйидаги фикрларни айтиб ўтди.

«Саҳоят барча учун» лойиҳасининг асосий мақсади сиз каби қадрдонларни ҳам жамиятнинг тўлақонли аъзоси сифатида кўриш. Бу лойиҳани кейинчалик ҳам давом этишини таъминлаймиз.

Туризмни ривожлантириш давлат қўмитасида барча имкониятлар борки, эртага сиз каби дўстларимизга тегишли шароитларни яратиш, яъни саёҳат қиладиган бўлса, аравачалар юриши учун мослаштирилган шароитларнинг бўлиши, автобуслардан чиқиб-тушишда имкониятларни ҳисобга олишимиз керак. Сизларни айлантирганимизда ўзимизнинг камчиликларимизни кўрамиз, бу биз учун дарс бўлади.

Биз бу саёҳатда ОАВларини ҳам жалб қилганмиз, улар бизнинг саёҳатимизни кўрсатишлари учун эмас, балки саёҳат давомида сизларда туғилаётган ноқулайликларни, камчиликларни кўрсатиб бериш учун жалб қилинган.

Иккинчи мақсад эса акцияни кўриб, қизиқиш билдириб, бизга шерик бўламан деган ташкилотлар ва ҳомийларга чақириқ берамизки, акция давомида нодавлат-нотижорат ташкилотининг ҳисоб рақамига келиб тушадиган маблағлар эвазига ушбу лойиҳани доимий ўтказишни таъминлаймиз.

Ушбу маблағларнинг 50 фоизи саёҳатларга, 25 фоизи имконияти чекланган шахсларни иш билан таъминлашга, яна 25 фоизи ушбу инсонлар учун аравачалар ёки бошқа ускуналар сотиб олишга йўналтирилган. Бугунги бошлаган хайрли акциямизда иштирок этганингиз учун барчангизга миннатдорчилик билдирамиз.

Абдулазиз Аққулов, Туризмни ривожлантириш давлат қўмитаси раиси вазифасини вақтинча  бажарувчи

«Лазер шоу» томошасидан сўнг тунги соат 12 ларга яқин «Registon palace» меҳмонхонасига йўл олдик. «Саёҳат барча учун» лойиҳасининг илк куни шундай унутилмас таассуротлар, қизиқ воқеалар ва мазмунли суҳбатлар билан якунланди.