Jizzaxning Baxmal tumanida 8 kilogrammdan ortiq giyohvandlik moddasi savdosi bilan shug‘ullangan shaxslarga sud hukmi o‘qildi. Bu haqda Jinoyat ishlari bo‘yicha Baxmal tuman sudi ma’lum qildi.
Ma’lum bo‘lishicha, Tojikiston fuqarosi A.Gulmurodov 8 kilogramm 667 gramm “opiy” giyohvandlik vositalarini, Tojikistondan kontrabanda yo‘li bilan O‘zbekiston chegara oldi hududidagi pinhoniy joyga yashirib ketilganligi to‘g‘risida Jizzax viloyati Baxmal tumanida istiqomat qiluvchi D.Botirovga telefon orqali xabar berib, bu giyohvandlik vositalarini Samarqand viloyatidan keluvchi tanishiga qulay joyga chegara oldi hududidan olib chiqib berishini aytgan.
Shunga ko‘ra, D.Botirov huquqni muhofaza qiluvchi organ xodimlariga ma’lum qilgan va ular aytilgan joyga xolislar ishtirokida chiqib, u yerdan jami og‘irligi 8 kilogramm 667 gramm “opiy” giyohvandlik vositalarini hujjatlashtirib olgan.
Fuqaro F.Bekpo‘latov 2016-yil 27-sentabr kuni soat 17:30 larda, o‘zining mashinasida bu giyohvandlik vositalarini D.Botirovdan olib ketish va kelgusida qonunga xilof ravishda sotish maqsadida Jizzax viloyati, Baxmal tumaniga kelganida huquq-tartibot idoralari xodimlari tomonidan o‘tkazilgan tezkor tadbirlar davomida jinoyat ustida fosh qilinib, to‘xtash haqidagi buyruqlarga bo‘ysunmasdan, ularga faol qarshilik ko‘rsatib, voqea joyidan yashiringan.
Natijada A.Gulmurodov, F.Bekpo‘latov va ularning jinoiy sheriklari jinoiy harakatlarini o‘zlarining xohish-irodasiga bog‘liq bo‘lmagan ravishda oxiriga yetkaza olmagan.
Sud tomonidan A.Gulmurodovga O‘zbekiston Jinoyat kodeksining 59-moddasi 8-qismiga asosan 13 yil, F.Bekpo‘latovga 12 yil muddatga ozodlikdan mahrum qilish jazosi tayinlangan.
Izoh (0)