O‘zA O‘zbekistondagi do‘konlarda sotilayotgan mahalliy va xorijiy mahsulotlar orasida qay biri afzalligi haqida maqola chop etdi. Unda “O‘zbekoziqovqatxolding” kompaniyasi raisi Tohirjon Jalilov bu borada o‘z fiklarini bayon etgan. Quyida maqola to‘lig‘icha havola etildi.
Do‘konga yoki supermarketga kirib bordingiz. Peshtaxtada ikkita mahsulot yonma-yon turibdi. Biri xorijda, ikkinchisi o‘zimizda tayyorlangan. Bunday vaziyatda ko‘pchilik xorijnikini olgisi keladi va oladi ham. Biroq... xorijiy 2 foizli 200 grammli qatiq yonida o‘zimizniki bor va nisbatan arzon. Shu o‘rinda muddatiga e’tibor qilsak, unisida ikki oy, o‘zimiznikida bir hafta. Qaysi biri afzal?
— Oziq-ovqat mahsulotlarini saqlanish muddati qancha kam bo‘lsa, shuncha ekologik toza bo‘ladi, — deydi “O‘zbekoziqovqatxolding” kompaniyasi raisi Tohirjon Jalilov, — misol uchun, Kanadadan kolbasa olib kelinmoqda, ularning saqlanish muddati ikki yil. Buncha muddat turishi uchun E 100 dan tortib E 600 kabi kimyoviy qo‘shimchalar qo‘shiladi. Sutning ham saqlanish muddati olti oy, ikki yil. Bunda mahsulot tarkibidagi barcha tirik organizmlar o‘ldiriladi. Mahalliy ishlab chiqaruvchilarda bir oydan 3—4 kungacha muddat bo‘ladi. Demakki, ular ekologik toza va tabiiy. Ammo keyingi vaqtda mahalliy ishlab chiqaruvchilar ham muddatlarni uzaytirishga harakat qilmoqda. Bu borada standart tashkilotlari bilan qator tortishuvlar bo‘lmoqda.
Shu o‘rinda kompaniya raisi muzqaymoqlarning sifati va kolbasaning arzonligi haqida ham o‘z mulohazalarini ma’lum qildi.— Yaqinda xorijning mashhur brendlaridan biri ishlab chiqargan muzqaymoqdan xarid qilib, avtomobilda bir soatdan ko‘proq yo‘l yurdik, — deydi Tohirjon Jalilov. — Shuncha vaqtda ham u erimadi. Vaholanki, haqiqiy muzqaymoq 30—40 darajada qisqa muddatda erib ketishi kerak edi. Kolbasa ishlab chiqarishda ham savollar ko‘p. Albatta, bu uning tannarxi bilan bog‘liq. Ko‘p hollarda kolbasani arzonlashtirish uchun soya solinadi. Go‘shtda qancha oqsil bo‘lsa, soyada ham shuncha bor. Soya solinganda kolbasa arzon bo‘ladi. Bu butun dunyo tajribasida bor. Bizda ham o‘zgarishlar davrida kim, qancha arzon mahsulot taklif qilsa, shu bozorni egasi bo‘lardi. Shu qarashlar hamon davom etayotgan joylar ham bor. Endi biz bitta mahsulotni olib, unga GOST berishni taklif qilmoqchimiz. Biroq bu ishni amalga oshirish oson bo‘lmaydi.
Shunday bo‘lsa-da, xolding kompaniya yurtimizdagi ishlab chiqaruvchilar uchun “O‘zbekistonniki yaxshi” tamg‘asini taklif qilmoqda. Qayd etish joizki, joriy yilning birinchi choragida “O‘zbekoziqovqatxolding” kompaniyasi tizimidagi 11 ming 700 ortiq korxona 18,2 trillion so‘mlik mahsulot ishlab chiqardi.
Ularning orasida nomi ancha mashhur korxona mahsulotlari ham mavjud. Ana shular orasidan mingga yaqin tashkilotga “O‘zbekoziqovqatxolding” kompaniyasi “O‘zbekistonniki yaxshi” tamg‘asini taklif qilmoqchi.
Mazkur belgi hammaga ham berilmaydi, ya’ni uning sifat borasida bir qator standartlari bor. Ana shu talablarga javob bergan mahsulotlarga va belgiga ega bo‘lgan mahsulotlar ko‘paygan rastalarga beriladi. Hozircha mazkur tamg‘aga ega bo‘lganlar uchun imtiyoz yoki yengillik yo‘q. Biroq mazkur belgi mahsulotlar sotilishini ko‘paytirib, mijozlar ishonchini oshirishi taxmin qilinmoqda.
Izoh (0)