Taniqli bloger Umid G‘ofurov O‘zbekiston xalqi, hokim va vazirlarga murojaat yo‘llab, Buxoroda budjet tashkilotlari xodimlari Hazrati Imom qabristonidagi obodonlashtirish, qurilish va ta’mirlash ishlariga jalb etilayotganini ma’lum qilgan edi. Blogerning ushbu videomurojaatidan so‘ng Bandlik va mehnat munosabatlari vazirligi holat yuzasidan tekshiruv boshladi.
Umid G‘ofurovning yozishicha, majburiy mehnatga jalb qilinganlar orasidan uning onasi ham bor. Ushbu xabar OAVda e’lon qilingach, uning onasi hokimiyatga chaqirtirilgan va xabarlarga qarshi matnni imzolashni so‘rashgan.
“Hozir onamni hokimiyatga chaqirib, bu xabarlarga qarshi matnni imzolashni so‘rashibdi. Hamma ixtiyoriy kelgan ekan 7 ertalabdan ishga. O‘qituvchilar ham, shifokorlar ham. Qaysi aql bilan shunday deyapsizlar? Mard bo‘lib tan olmaysanmi aybingni?
Kamida OITS markazi, 23 internat, poliklinikalardan kelib ishlaganlarni bilaman.
Shu qabristonda kim majburiy ishlatilgan bo‘lsa, menga yozsin. Hamma ixtiyoriy ishlagan deyishyapti. Sizning haqlaringizni talab qilishimda menga yordamlashing!”, — deb yozadi Umid G‘ofurov.
Izoh (0)