O‘zbekiston hukumati 1-yanvar kuni Toshkentning Yunusobod tumanida boshlangan aholi tomonidan elektr energiyasini iste’mol qilishning bazaviy stavkasini joriy etish bo‘yicha tajribani muvaffaqiyatli deb tan oldi. Vazirlar Mahkamasining 30-iyuldagi “Yoqilg‘i-energetika resurslari narxlari va tariflarining o‘zgarishi to‘g‘risida” qarorida mazkur tajriba natijalari ijobiy baholangan, deb xabar beradi “Gazeta.uz”.
Hujjat bilan energetika, moliya, iqtisodiyot va sanoat vazirliklariga, shuningdek, “Hududiy elektr tarmoqlari” kompaniyasiga bir oy ichida elektr energiyasi va tabiiy gaz iste’moli uchun bazaviy normalarni qo‘llash miqdori hamda mexanizmini tayyorlash bo‘yicha takliflarni ishlab chiqish topshirildi.
Shu bilan birga elektr energiyasi iste’molining bazaviy normasini bir abonent uchun 250 kVt/soat etib belgilash taklif qilinmoqda (Yunusoboddagi tajribada — 300 kVt/soat), belgilangan normadan oshib ketadigan energiya koeffitsienti uchun esa to‘lov tarif narxining 1,5 barobarini tashkil etishi mumkin (tajribada — 1,2).
Avvalroq, energetika vaziri Alisher Sultonov Yunusoboddagi tajriba natijasida davlatga kelayotgan pul mablag‘lari 60 foizga oshgani va ortiqcha yo‘qotishlar qisqarganini ma’lum qilgandi.
Mazkur tajriba Toshkent shahrida to‘liq, qisman Samarqand, Buxoro va Jizzaxda amaliyotga tadbiq etiladi.
Izoh (0)