Ўзбекистон ҳукумати 1 январь куни Тошкентнинг Юнусобод туманида бошланган аҳоли томонидан электр энергиясини истеъмол қилишнинг базавий ставкасини жорий этиш бўйича тажрибани муваффақиятли деб тан олди. Вазирлар Маҳкамасининг 30 июлдаги «Ёқилғи-энергетика ресурслари нархлари ва тарифларининг ўзгариши тўғрисида» қарорида мазкур тажриба натижалари ижобий баҳоланган, деб хабар беради «Gazeta.uz».
Ҳужжат билан энергетика, молия, иқтисодиёт ва саноат вазирликларига, шунингдек, «Ҳудудий электр тармоқлари» компаниясига бир ой ичида электр энергияси ва табиий газ истеъмоли учун базавий нормаларни қўллаш миқдори ҳамда механизмини тайёрлаш бўйича таклифларни ишлаб чиқиш топширилди.
Шу билан бирга электр энергияси истеъмолининг базавий нормасини бир абонент учун 250 кВт/соат этиб белгилаш таклиф қилинмоқда (Юнусободдаги тажрибада — 300 кВт/соат), белгиланган нормадан ошиб кетадиган энергия коэффициэнти учун эса тўлов тариф нархининг 1,5 баробарини ташкил этиши мумкин (тажрибада — 1,2).
Аввалроқ, энергетика вазири Алишер Султонов Юнусободдаги тажриба натижасида давлатга келаётган пул маблағлари 60 фоизга ошгани ва ортиқча йўқотишлар қисқарганини маълум қилганди.
Мазкур тажриба Тошкент шаҳрида тўлиқ, қисман Самарқанд, Бухоро ва Жиззахда амалиётга тадбиқ этилади.
Изоҳ (0)